"Cham rih la Southgate" an ti - a sawi chiang thei lo!

World Cup quarterfinal aṭanga tla hlim England manager Gareth Southgate chuan a hma hun a sawi chiang thei lo a, cham tura duhtu tam zawk mah se a ngaihtuahna a suk kual reng thu a sawi!

Kum 52 mi coach chuan, "Thla li thla nga hnuah thutlukna siamsual vanga inchhir ka duh lo a, 'ka tisual palh' tih mai maina tur chuan thutlukna siamna tur hi a lian lutuk hret a ni," a ti.

Southgate hian October 2016 khan England team hi a enkawl ṭan a, World Cup 2018-ah semifinal hruai thlengin nikum khan European championship-a a vawi khat nan final a hruai thleng bawk.

Coach langsar ni lo mah se Southgate hian a record vangin cham tura duhtu a ngah a, hetihrual hian a chetsual hun chang a, Three Lions coach hna bansan tura duhtu tam tak an awm ve bawk - thutlukna siam a harsat hi a demawm lo.

A harsa
Southgate hian England a enkawl hnuah major tournament-a knockout match rukah hnehna a chanpui a, Three Lions a enkawl hma kum 48 chhunga major tournament knockout match-a England chak zat chu match ruk tho a ni!

Mahse, England hi Qatar World Cup an hmachhawn hma hian UEFA Nations League group A aṭangin an relegate a, vawi thum tlawmin, vawi thum an khingpui an hnehtawkpui a, chak an nei miah lo.

Wolverhampton Wanderers stadium Molineux-a 4-0 a Hungary an hneh loh ṭum phei chuan fans an lungawi lo a, "I thiltih hi i hre lo a ni," tiin an coach hi an au el a, bang turin an duh.

Southgate-a'n Wolves-a thil thleng a la theihnghilh hman bik lo a, English coach chuan, "Tun hnaia kan hun hman dante nuam ti viau mah ila, thla 18 liam ta chhunga thil thlen dan pawh ka la hre reng - ka chungchang an sawi leh ziak pawh ka hria a, Wolves-a thil thleng pawh ka la hria a ni," a ti!

Ngaihtuahna buai
Southgate hian December 2024 thleng cham turin England tan contract a la nei a, mahse, coach berin ban a duh miau chuan dan theih a ni lo ang - tunah erawh a rilru a buai rih.

English coach chuan, "Ka rilru ngaihtuahnaah hian thil tam tak a awm a, a inthlak reng a ni. England-ah hian cham a ngai a nih chuan cham tur erawhin thahrui ka la nei reng a ni," a ti.

Southgate hian England hi match 81-ah kaihruaiin, vawi 49 hnehna a chanpui a, tun World Cup-a France laka 2-1 a an tlawm chiah khan Three Lions a enkawl hnua vawi 14 an tlawmna a ni.

World Cup 2018-ah khan semifinal lut mah se 1-0 a hma an hruai hnuin, Croatia lakah 2-1 in an tlawm a, Euro 2020 final-ah penalty hmangin an chak lo bawk - he inkhelah pawh hian goal an khung hmasa zawk a, Southgate leh England an vanduai ṭhin hle.

Thutlukna dik
Southgate chuan, "Tun hnaia kan tournament khelhte thlirlet hian, a zawh hnua ka hun hman dante thlir hian harsa ka ti ṭhin hle tih ka hria. Ka chakna tam tak a la a, thluakah thil tam tak a awm bawk.

"Ka cham emaw, ka bang emaw pawh ni se, thutlukna dik siam hi ka duh chu a ni. Ka chhunzawm dawn a nih pawhin thutlukna dik a nih a ngai a, ka bang dawn a nih pawhin thutlukna dik a nih a ngai.

"Chuvang chuan tun hi thutlukna siam hunah ka ngai lo a, tun hnaiah pawh siam mai chi niin ka hre chuang lo," a ti a, England fan-te chuan an coach ban dawn leh dawn loh an hre rih lawk dawn lo niin a lang.

Player a nih laia England tana vawi 57 inlan tawh Southgate hi coach langsar leh tawnhriat ropui nei ni lo mah se, Three Lions tana a hnathawh ṭha erawh sawi hnâwm theih a ni lo thung.

Cham rih la...
Southgate-a hma hun a chiang lo a, England coach nih beisei tam tak chu an lo in 'warm-up' ṭan tawh hial mai thei. Mahse, a player-ten English coach hi cham zel tura an duh thu an sawi chhuak.

West Ham midfielder Declan Rice chuan, "Southgate hi a cham hram ka beisei - he team a din leh ruahmanna a neihte en hian, a team tana khelh hi a nuam tlat a ni. England tana khelh hi ka ngaihlu a, Southgate-a hnuaia khelh pawh nuam ka ti," tiin an coach a chelh.

England centre back Harry Maguire pawhin an coach chu coach ṭha tak a nih thu a sawi a, hetihlai hian Three Lions legend Alan Shearer chuan, "Hnathawh zawh loh a la nei a ni," a ti a, Rio Ferdinand chuan, "An thawnthu a la tawp lo," tiin Southgate chu English football thawnthu ngaihnawm ziak zel turin a duh.

ITV pundit an nihna anga an sawinaah England international hlui Gary Neville & Ian Wright, Republic of Ireland captain hlui Roy Keane-ten Southgate chu cham tura an duh thu an sawi vek a, BBC pundit pahnih Martin Keown leh Jermaine Jenas te chuan, "100% in a chhunzawm ṭha kan ti," an ti bawk.