Axelsen a la thiam ber

Viktor Axelsen chuan mipa badminton thiam ber a nihna a nemnghet leh ta. Pathianni zana khelh zawh tak World Tour Finals-ah Axelsen hian Indonesian player Anthony Ginting chu 21-13, 21-14 a sawpin a nomawi kawl lai a humhim.

Denmark star Axelsen hi champion lai a ni a, a thiam zual pariat inelnaah amah khing zo an awm lo. Badminton World Federation (BWF) hnuaia season kal laiah nomawi pariat a lakna niin, atan chuan kum ṭha bik a ni ngei ang.

Kum 28 mi Axelsen chuan, "Hetiang baka kum tawp kharna ṭha hi ka tan chuan a awm thei tawh chuang lo ang. Game hnih kha awlsam taka la angin ka lang a ni mai thei, a niha takah erawh chuan point khat leh hlawhchhuah pawh kha a awlsam lo hle.

"Ka tan chuan kum ṭha bikte zinga mi a ni a, season thar atan inrintawkna sang tak ka neih theih phah bawk ang," tiin a sawi. Axelsen hi Asian player ropui tak tak zinga European tlangval rawn ding chhuak thei a ni a, a sulhnu hi a nep lo hle a ni.

Hmeichhe singles final-ah world champion ni lai Akane Yamaguchi chuan Tai Tzu Ying chu 21-18, 22-20 a hnehin a champion ve bawk a, Tokyo Olympic silver medalist Tai-i hian ama tihsual vanga point a paih hnem a tuar.

Mipa doubles lamah Chinese pair Liu Yuchen leh Ou Xuanyi te ṭangdun chuan, an khungpui Indonesian player Mohammad Ahsan leh Hendra Setiawan te chu 21-17, 19-21, 21-12 in a hneh.

Hmeichhe doubles lamah pawh Chinese bawk an chungnung. Chen Qingchen leh Jia Yifan te chuan Thai unau Benyapa leh Nuntakarn Aimsaard te chu 21-13, 21-14 a hnehin an champion bawk.