Ten Hag-a'n Rashford leh Mbappe inang a ti!

Manchester United manager Erik ten Hag chuan a striker Marcus Rashford leh France superstar Kylian Mbappe ten inanna an neih thu a sawi a, World Cup khelh zawh taka England top scorer chu a chhuang hle.

Ten Hag chuan, "Ka hmuh hmasak ber aṭang khan theihna sang tak a nei tih ka hria. Defending line tawp ber nena indinchilh a ralah phei chuan, tun dinhmuna a aia ṭha awmchhun chu Mbappe a ni," a ti a, a striker leh Mbappe khelh dan chu inang a tih thu a sawi.

Marcus Rashford hian season hmasa kha hliam nena bul ṭanin a hmang ṭha lo hle - inelna hrang hrangah match 32 khelin goal nga chiah a khung a, 2015-16 season hnua a vawi khat nan season tluana goal 10 a khung tlin loh hmasak ber a ni.

Mahse, tun season-ah Rashford a insiam rem a, English striker hian inelna hrang hrangah match 19 khel tawhin goal riat a khung a, England squad-ah a kir leh ta bawk.

Rashford hian World Cup-ah khan England tan goal thum a khung a, Sir Bobby Charlton nen Manchester United player zinga World Cup vawi khata goal thum aia tam khung thei awmchhun an ni.

Ten Hag chuan a player chu tlarhnung chhaih buai bakah, ball chan loh laia khingpui team a press danah pawh hma a sawn nasat thu a sawi a, Wales laka Phil Foden-a goal khung theih nana tlarhnung a lo tihbuai dante chu ṭha a tih thu a sawi.

Dutch coach chuan, "Khatiang khan a ti fo ṭhin a, England tan khan hna a thawk ṭha takzet a ni," tiin a player chu a chhuang hle - mahse, Rashford hi United-ah a contract a hmang zo hnai tawh a, season tawp rualin Old Trafford-a a contract a tawp tawh dawn.

Rashford bakah hian goalkeeper David de Gea, full back pahnih Diogo Dalot leh Luke Shaw, midfielder Fred te chu nipui rualin an contract a zo ve dawn bawk.

Ten Hag erawh a buai phah lo. United boss chuan, "Kan kutah engkim a la awm vek a, contract pawtsei turin duh kan thlang thei a, kan thlir ho leh ang," a ti a, a player ṭhate hi an duh chuan kum khat dang contract pawhsei theihna dan a awm tel a ni.

Hetihlai hian Rashford erawh chhuak thei dinhmunah a ding reng a, Paris St-Germain chuan English forward hi sum tam tham taka thlem chhuah an tum nia sawi a awm - August khan Rashford-a aiawhte leh PSG lam chu an lo inhmu tawh.

Ten Hag chuan, "Thutlukna a siam a ṭul ang. Keinin kan tih theih chu a tan chuan United hi club ṭha ber a ni tih hrilh hriat hi a ni - club kalphung, hnathawh dan, khelh dan leh train dan thleng hian a tan a ṭha a ni.

"Chutihrual chuan player a nihna angin a ṭhan zelna turin hmun a awm tih tarlan pawh a ṭul a, sum pawh sawi tel a ngai tho ang chu. A tawpah chuan thutlukna chu a kuta awm a ni a, mahse, kum khat leh a chanve chu a la châm ang," a ti a, kum khat dang chelh a tum.