Chelsea striker Armando Broja a inhliam

Premier League club Chelsea fan-ten chanchin lawmawm lo hriat tur an nei a, Aston Villa nena friendly match an khelhnaah striker Armando Broja chu a inhliam.

Blues boss Graham Potter chuan a striker hliam dinhmun a ṭhat loh thu sawiin, "Tun dinhmunah chuan a dinhmun hi a ṭha lo a, mahse, thutlukna siam nan chuan a la hma hret. Hliam na tak a nih loh hram ka beisei a, sawi thiam erawh a harsa a ni," a ti.

Kum 21 mi Broja hi Villa defender Ezri Konsa nen an insu palh a, zawn chhuah a ngai zui. World Cup laiin club ṭhenkhatin player-te in 'fit' theih nan friendly match an khel a, Abu Dhabi-a inkhelah hian Villa hian 1-0 in hnehna an chang a, John McGinn chuan inkhela goal awmchhun a khung.

Albania international Broja hian tun season-ah league match 12 khel tawh mah se heng zinga 10-ah hian bench aṭangin a lut a, goal khat a khung tawh - buai lutukna tur niin a lang lo.

World Cup chawlh neih a nih hma khan Chelsea hi league match thumah a zawnin an tlawm a, table-ah pariatna ni mekin, hmahruaitu Arsenal chu point 16-in an phak lo mek - World Cup hnua an match hmasa ber chu December 27, zan dar 11:00-ah Bournemouth mikhualin an khel ang.