Leipzig, Bayern, Gladbach leh Dortmund inum zel

Bundesliga-ah Bayern Munich-in ro an rel an ṭhin a, tun season boruak a dang. Match 19 an khelh tawhah RB Leipzig-in hma an hruai mek a, Bayern Munich pawhin manager Niko Kovac ring zo loin assistant manager Hans-Dieter Flick chu club enkawl turin an dah chho. Bavarians elpha ber tura ngaih Borussia Dortmund-in season bul an ṭan fuh lo a, Erling Braut Haaland an neih hnuah erawh an boruak a kang hle. Bundesliga chanchin ngaihnawm ber ṭum a ni hial ang.

Bavarians an kal fawr leh tawh a, kumina an match hmasa berah Hertha Berlin 4-0 in an sawp. An match hnuhnung berah Hans-Dieter Flick-a hote hian Schalke 5-0 in an hneh. Zanin dar 8:00-a an hmachhawn tur Mainz hi Allianz Arena-ah 6-1 in an sawp tawh a,  Opel Arena-ah a thlen nawn a rinawm ta hle.

Bayern Munich an chet ṭhat leh tak avangin RB Leipzig-in pressure an ngah a, an match hnuhnung berah Eintracht Frankfurt an hneh lo ringawt. Zanin dar 11:00 hian Leipzig hian a sang pathum zinga mi Borussia Monchengladbach an hmachhawn dawn a, inkhel pawimawh bik a ni.

Leipzig hian point thum an hmu thei lo a nih chuan Bayern tan kawng an sial ang a, Gladbach pawh an chak zo lo a nih chuan Borussia Dortmund hnuaiah an awm thei ang.

Borussia Dortmund sawi rik apiangin chanchin ṭha hriat tur a awm chho zel. Dortmund hian Bundesliga an beisei zel theih nan Juventus aṭangin Germany international Emre Can chu loan hmangin an lalut dawn. Chutihrualin Paco Alcacer chuan an ram club Villarreal a zawm thung.

Spanish forward Alcacer hian Dortmund tana season hmasa berah Bundesliga-ah match 26 khelin goal 18 a khung. Thlirna dangah erawh Dortmund-in Haaland an nei tawh a, Norwegian striker hian match hnihah bench aṭanga lut ve ve chungin goal nga a khung tling der a, Alcacer chhuak vangin an hnual hran lo ang. 

Dortmund hian zanin dar 8:00 hian Union Berlin an mikhual dawn a, mipui mit fukna tur chu Haaland a ni leh dawn. Chutihrualin Haaland an sawi vul phenah hian hming langsar ṭhin Jadon Sancho leh Marco Reus te an khel ṭha reng tih hriat a ṭha a, an squad a chhah avangin champion rinkai zingah an tel chho leh tawh a ni.

Borussia Dortmund    8:00 PM    Union Berlin

Hoffenheim    8:00 PM    Bayer Leverkusen

Fortuna Dusseldorf    8:00 PM    Eintracht Frankfurt

Mainz 05    8:00 PM    Bayern Munich

Augsburg    8:00 PM    Werder Bremen

RB Leipzig    11:00 PM    Borussia M'gladbach

FC Cologne    8:00 PM    Freiburg

Paderborn    10:30 PM    Wolfsburg

1    RB Leipzig    19    12    4    3    51    23    28    40

2    Bayern Munich    19    12    3    4    55    22    33    39

3    Borussia M'gladbach    19    12    2    5    36    21    15    38

4    Borussia Dortmund    19    10    6    3    51    28    23    36

5    Bayer Leverkusen    19    10    4    5    30    22    8    34

6    Schalke 04    19    9    6    4    31    26    5    33