Gaming News PUBG Mobile-in India rama privacy policy a thlak?

Thawhṭanni khan Players Unknown Battle­ground (PUBG) Mobile kheltute rilru tibuaitu thuthar India ramah a darh nasa hle a, hei hi PUBG Corporation lam pawhin an hria a, thuchhuah thar siamin India rama an privacy policy an thlak tih an tarlang ve nghal.

India tan PUBG Mo­bile chuan privacy police an ennawn tih tarlangin India mi PUBG player-te data chu India ramchhunga server-ah dah ṭhat a ni tih an tarlang. Company chuan India-ah chuan support team leh engineering team hran an nei tih an tarlang tel bawk.

Policy an siam ṭhatah hian PUBG Mobile server chu India-ah a awm tih leh information inhrilh tawn chungchangah erawh third party an hmang tih an sawi. Hei hi cloud service tan a ṭha ber tih leh backup leh fraud detection atana ti an nih thu sawiin,  third-party service provider-te hi Game Service (game photo share ang chite), customer sup­­port ticket ID leh support communication, marketing leh advertise­ment bakah Game Service chungchang information pekna atan leh update chungchang vel atan an hmang. E-sports event leh payment process atante pawh an hmang bawk tih an tarlang a ni.

Company chuan service provider zawng zawngte chu game kheltute mimal information hman theihna lakah an dal tih tarlangin an service chungchangah erawh an dal lo thung. Party dang tia an tarlan zingah hian Tencent corporate group, regulator, judicial authority leh law enforce­ment agency-te pawh an tel.

Hemi awmzia chu India player-te data chuan India ram a pelh loh bakah third party hnenah hralh a ni lo bawk. India sorkarin appli­cation 275 a enfiah leh tur zingah hian PUBG Mobile hi a tel ngei em tih  chiang taka sawi theih la ni lo mah se PUBG Mobile hian a policy hi a siam ṭha nasa hle tho a ni.