Hello World Cup semifinal France hmaah beiseina neitu Morocco!

World Cup ropuina leh mawina pholangtu pakhat chu Morocco an ni a, Qatar-a inelna ṭan a nih dawna ngaihven pawh hlawh phak lo team hi tunah chuan World Cup-a a thiam pali zingah an tel tawh.

Zanin dar 12:30 hian France leh Morocco ten World Cup final luh an inchuh dawn a, inkhel hmuhnawm thlir turin inbuatsaih la, i tisual lo ang - an hmaa inchhawp hi a hraw em!

Tawnhriat chhuan tur a nih chuan Morocco tan France hi el phak rual an ni lo - Les Bleus hi world champion ni lai an ni a, kil tinah world class player tia chhal theih an kawl vek bawk.

Morocco tan erawh an rah chin apiang hi World Cup-a an thlen theih sang ber zel a ni tawh a, mahse, beiseina leh thawhrimna chu an inchhuanna a ni - Belgium, Spain leh Portugal hnehtu an ni, tih theihnghilh lo ila!

Goal vs tlarhnung
France-in tlarhmaah Antoine Griezmann, Olivier Giroud, Kylian Mbappé leh Ousmane Dembélé te an chhawp thei a, tun World Cup-ah ringawt goal 11 ngawt an khung tawh - Morocco tlarhnung tan anni ho mitthla ringawt pawh hi muttui lohna tham a ni.

Mahse, France ṭantute lo hlim lutuk suh u - Morocco hian tun World Cup-ah goal khat chiah an la chhuah a, chu pawh anmahni lama Nayef Aguerd-a'n a tih goal palh kha a ni a, France lakah tlarhnung ven phui theih an beisei ang.

Morocco tana buaina langsar erawh defender rinrawl Romain Saiss inlan theih dawn leh dawn loh a chiang lo a, Nayef Aguerd chu quarterfinal-ah khan a inlan tawh lo bawk - first choice centre back pahnih an inlan loh chuan a pawi thui thei.

Chutihrual chuan Saiss hian semifinal khel tura theihtawp a chhuah tur thu a sawi a, Aguerd nen an rawn inkawp thut a nih pawhin a mak lo ang. Bayern Munich full back Noussair Mazraoui pawh Portugal laka a inlan loh hnuin inlan thei tawh tura beisei a ni.

Morocco beiseina
Team pahnih player khaikhin a rem lo a, hetihrual hian Morocco-in team work leh beiseina an hmachhuan miau avangin France laka tlawm tura dah sa an rem lo - i awih loh chuan an semifinal kalkawng thlir mai rawh.

Morocco boss Walid Regragui chuan, "Duhna, tumna leh beiseina i neih chuan i hlawhtling thei tih hi ka player-ten a takin an lantir a ni," a ti a, kil tinah player langsar kawl ve lo mah se, an beiseina chuan a hnuh kal thu a sawi.

Regragui chuan sawi zawmin, "Semifinal kan thleng hi thilmak a ni lo - Europe mite chuan thilmak tiin an sawi mai thei. Mahse, Portugal, Spain leh Belgium kan hneh a, goal chhuah loin Croatia kan inhnehtawkpui bawk.

"Hei hi kan thawhrim rah a ni," a ti a, vanneihna avanga World Cup semifinal lut an nih loh thu a sawi - zaninah defensive game khelin, a ṭul huna France vaw let thei turin an inruahman leh ang a, an khel a hmuhnawm khawp ang!

Ṭhian ata hmelma
Paris Saint-Germain tan France chhuanvawr Kylian Mbappé leh Morocco thiampuipa Achraf Hakimi te an khel dun a, zaninah erawh player pahnih hi an inven a ṭul dawn a, ṭhian kha hmelma an nih a ṭul rih.

January khan Mbappé chuan, "Hakimi hi khawvela right back ṭha ber a ni," tiin twitter lamah a lo ziak tawh a, zaninah he right back ṭha mi hian Mbappe ven a tum dawn.

Player pahnih hian an chakna leh chak lohna an inhriatsak tawn a, hei vang tak hian anni pahnih intawng tur hi en a châkawm lehzual hle - tun World Cup-a goal khung hnem ber Mbappé (5 goals) leh goal khat chiah la chhuah Hakimi an intawng dawn e!

Mbappe leh Hakimi hi PSG tan an khel dun satliah lo a, an inkawmngeih hle. Hakimi chuan, "Player khelhpui nuam tak a ni - ball kan pek chuan danglamna a thlen dawn tih kan hre tlat a ni," a ti a, zaninah erawh a hmachhawn a ṭul dawn.

Semifinal phawt
Kum 1962 khan Brazil chuan World Cup nomawi an humhim a, a hnuah a zawna world champion ni leh thei an awm tawh lo - tun hnaiah phei chuan champion lai ni chungin Italy, Spain leh Germany chu group stage-ah an tla vek!

World Cup 1998-a Brazil hnua champion lai semifinal lut leh thei hmasa ber chu France bawk hi an ni a, an record hi a ropui hle. Mahse, coach Didier Deschamps erawh a ṭawng uang duh chuang lo.

France coach hi final chungchang zawh a nihin, "Inngaihtuah thui mah mah a nih chu," tiin zawhna a chhang a, semifinal lama rilru sawr bing phawt a duh a, champion zawn phei chu a la mitthla lo tawp niin a lang.

Les Bleus tan tlarhma piahlamah, midfield-ah Aurélien Tchouaméni leh Adrien Rabiot chet ṭhat a ṭul a, goalkeeper Hugo Lloris hoin Jules Koundé, Raphaël Varane, Dayot Upamecano leh Theo Hernández te chet ṭhat a ṭul bawk ang.

Semifinal kan inpetkai a, final kan hnaih ta sawt. Mahse, Morocco nen inkhel pawimawh kan la nei tih hriat a ṭha. World champion-ten a dawt world cup-ah an ti ṭha ngai lem lo a, mahse, keini chuan result ṭha tak kan nei thei. - Didier Deschamps, France manager

Semifinal ringawtah kan lawm lo a, African team zinga a sang pali zinga tel hmasa ber nihah hian kan lawm tawk lo - hei aia thui zawk thlen kan duh. Khawvela team ṭha pali zingah kan tel a, final luh kan duh. Team ṭha ber Brazil petchhuah an ni tawh. Chak duhna thinlung ka nei a, a tawk zo ang em, kan hre lo - mahse, Africa hian rorel ila kan duh a ni. Mipui rin kan hlawh lo tih pawh kan hria a, mahse, kan inringtawk. Atthlak in ti mai thei a, mahse, ât deuh pawh hi a ṭhat chang a awm. - Walid Regragui, Morocco coach