Rocky ang mai kan ni - Regragui

Africa khawmualpui aṭangin footballer ṭha tam tak lo chhuak tawh mah se Cameroon (1990), Senegal (2002) leh Ghana (2010) chu World Cup quarterfinal khel thei awmchhun an ni ṭhin a, champion phei chu hlat tak an ni.

Mahse, mipui rin loh leh beisei loh Morocco-in tun World Cup-ah thawnthu chu an her danglam a, Africa aṭanga semifinal khel thei hmasa ber an ni ta - a aia ngaihnawm zawk thawnthu ziah zel an duh.

Morocco boss Regragui chuan, "African leh Arab ramte hi kan thawkrim em em a, mahse, hei vang hian kan mipuite chu hlim leh inchhuang takin kan awmtir thei ṭhin a ni.

"Africa khawmual pumpui chu tunah hian an hlim em em a ni. Rocky Balboa movie kha in en chuan, a thawhrim em avangin hlawhtling turin in duh ang - tun World Cup-ah hian 'Rocky' chu keini hi kan ni," a ti a, an dinhmun a sawifiah thiam hle.

Kum 47 mi coach chuan, "Mi tam tak chuan first round-ah khan kan tla dawn emaw an ti. Mahse, ka player-te hnenah Hakim Ziyech (Chelsea), Noussair Mazraoui (Bayern Munich) leh Achraf Hakimi (Paris St-Germain) te ang player kan neih thu ka sawi.

"Top club-a khel player kan nei a, World Cup-a hnehna chang thei khawp team kan nei - hei hi ka player-ten an hriat ka duh. Mahni inrintawkna neih a ṭul a, inchhir hauh lo tura theihna zawng zawng hlan a ṭul - hei hi ka sawi a, ka thusawi an ring hlauh a ni," a ti.

Regragui hi coaching-a a luhna a la rei lo. Mahse, a kalna apiangah nomawi a chawi a, season hmasa lawk khan an ram club Wydad AC chu league leh African Champions League-ah nomawi a chawipui - World Cup nomawi a beisei tawh ang.