Maguire hi kan tan player ropui a ni thei ang - Ten Hag

Erik ten Hag chuan England tana Harry Maguire khelh dan chu ṭha a thi hle a, a club khelh mekna Manchester United tan pawh player ṭha leh ropui bik a nih theih ngei a beisei thu a sawi chhuak.

Kum 29 mi Maguire hian Man United lamah beisei a phak lo ṭhin, chet fuh loh chang a ngah avangin manager Ten Hag-a'n a ring ngam lo a, nipui bazarah Ajax aṭangin Lisandro Martinez a lei phah hial a nih kha.

England international defender hian, kumin August thla hnu lamah Man United tan Premier League match vawi khatah chiah inkhel bul a ṭan phak. Raphael Varane hliam karah a inlan a, hemi ṭum pawh hian Brentford 4-0 in an hneh lo.

Ten Hag chuan, "Zawhna ka dawng hnem ta malh malh khawp mai, a tira ka sawi ang tho khan Harry Maguire hi inelna sang taka khel turin a ṭha tawk. A nihna takah chuan Manchester United chet fuh loh lai leh a hun a intawng fuh ve bawk.

"England tana a khel en ila, khawvel defender ṭha berte zinga mi a ni phak. Ram tana a khelh ang kha Manchester United lamah pawh rawn senglut turin ka duh a, ka beisei nghal bawk a ni.

"Kei chauh ni loin a khelhpui player dangte pawhin ṭha taka khel turin an ringtawk a, ram tana a khelh anga a khel thei a nih ngat chuan kan tan player ropui tak a ni ang," tiin a sawi a, a captain chu hun ṭha a la pek ngei a rinawm.

World Cup-ah Maguire hi England tan player pawimawh a ni a, match zawng zawngah inkhel bul a ṭan vek. France hneh loin quarterfinal-ah an zinkawng a tawp a, tunah chuan Old Trafford lamah rilru a pe leh thei tawh ang.

Dutch manager Ten Hag-a'n tlarhnung laiah Varane leh Lisandro Martinez te a chhawr rim a, anni pahnih awmna France leh Argentina ten World Cup an la khel mek a, club lama an kir hun tur a la sawi theih loh.

December 27 hian Manchester United chuan Nottingham Forest an mikhual dawn a, inbuatsaihna ngawrh taka kalpui a ngai leh tawh. Tuna a lan dan chuan Maguire hian Krismas vuak vetah Man United tlarhnung a uap a ngai dawn.

Ten Hag chuan, "Tlarhnung laia khel thei player ṭha tak tak ka nei, a vaia khelh rual tir vek theih erawh a ni lo. A pawimawh lai chun hun ṭha tlemte awm hman ṭangkai thiam a ni, chumi tur chuan training ṭha taka neih a ngai," tiin a sawi.

Premier League match 14 an khelh tawhah Manchester United hian point 26 an hmu a, league table-ah pangana an ni mek. Hmahruaitu Arsenal an phak lohna chu point 11 lai a ni a, champion beiseina erawh a la bo lo.