Ferrari team hotupa thar Vasseur

Formula 1 team hlun tan Ferrari chuan hotu thar an nei, season thar tir aṭangin Frederic Vasseur chu an team principal a ni ang, ani hian thla hmasaa principal nihna bansantu Mattia Binotto hmunruak a luah dawn a ni.

Kum 54 mi Vasseur hian Formula 1 huangah tawnhriat a ngah tawh, tun hmain Alfa Romeo/Sauber tan pawh managing director hna pawh a lo thawk tawh a, tunah chuan team lian leh hlun zawkah a lut.

Italian team Ferrari hian car an nei ṭha, an tlan chak em em bawk. Mahse, car chak bera ngaih nei chungin an hlawhtling hleithei lo, driver tanwhriat nei ṭha Sebastian Vettel hunlai aṭangin an champion thei lo.

Driver chhuak thar, khawvela beisei awm berte zinga mi Charles Leclerc an nei leh a, mahse ani pawh hian a champion pui thei chuang lo. Principal thar Vasseur tan Ferrari enkawl hi chona hautak tak a ni ngei ang.

Ferrari chief executive officer Benedetto Vigna chuan, "Car intlansiak huangah Fred hian sulhnu tam tak a lo nei tawh ṭhin, a bik takin khawl thil lam a hre hle a, team ho khawm thiam tak a ni bawk, hruaitu ṭha a nihna hi kan tan a ṭangkai khawp ang," a ti.

January 9 aṭanga Ferrari zawm tur Vasseur chuan, "Ferrari hi team hlun leh ṭha berte zinga mi a ni a, kan inzawm thei hi ka lawm. Ka tan chuan chona lian tak a ni dawn, chutih rualin engkim nei ṭha sa an nih avangin hna thawh a harsa lo turah ka ngai," tiin a sawi.