Ka tennis hun a tawp emaw ka ti hman - Zverev

Alexander Zverev chuan French Open khelh laia a hliam chungchang a sawi chhuak a, a nihna takah chuan tennis a khelh chhunzawm thei dawn tawh lo emawni a ti hial.

French Open semifinal-ah Zverev leh Rafael Nadal te an inkhel a, inkhelh laklawh laiin German tlangval hi a inbilh a, a ke ruh a kawi ngawk thei hial a, wheelchair nen tennis court a chhuahsan a ngai a nih kha.

Tunah erawh Zverev hi a dam leh tawh, tun hnai khan Diriyah Tennis Cup exhibition a khel thei leh tawh, season tharah chuan ṭha takin tennis a khel pangngai leh thei tawh tura ngaih a ni hial.

World number 12 Zverev chuan, "Ka tan chuan rilru lam fiahna na tak a ni, a nihna tak sawi chuan tennis ka khel chhunzawm leh tawh miah lo ang tih ka hlau hman hle, chawlhkar ruk chhung kha chu rilru mumal pu hleithei loin ka awm.

"Beisei phak bakin ka dam leh a, tunah chuan taksa mai bakah rilru thlengin ngai ka awh ve leh ṭan tawh niah ka ngai. Ka tan chuan tennis court chhung luh ve leh hrim hrim pawh hi lawmna tur a ni," tiin a sawi.

German tlangval hian January thla chawhnu lama khelh tur Australian Open khelh a tum a, chumi hma chuan tournament tenau zawkah intuaihriam turin a inlan ngei a rinawm bawk.