India tana match 100 kheltu Remsiami

Lalremsiami Hmar chuan india senior hockey team tan match 100 a khel tling ta. Siami hian 2017 aṭanga khan India senior team tan a khel ṭan a, kum naupangte ni chungin mellung pawimawh tak a phun der tawh a ni.

Mizo nula awmna India team hian Spain-ah FIH Women's Nations Cup an khel mek. Thawhṭanni zan khan India hian Japan 2-1 in an hneh, he inkhelah hian Remsiami lutin ram tana a match 100-na a khel tling ta chiah, a la khelh belh zel ang.

Kolasib nula Remsiami chuan, "Pathian zarah kan ram tan match 100 ka khel ve ta, hetiang hun ka thleng ve mai hi ka lawm takzet. Engtik lai pawha min thlawp tlattute ka chhungte bakah Mizo mipuite chungah lawmthu ka sawi," tiin a sawi.

India tana goal 29 khung tawhtu Remsiami hian ram tan senior huangah Asian Cup champion a ni tawh a, Commonwealth Games-ah silver medal a hlawhchhuak tawh bawk - Olympic hnuhnung berah khan India chu palina dinhmun a luahpui bawk.