Player ṭha ber atan Swiatek an thlang

Hmeichhe tennis thuneitu sang ber Women's Tennis Association (WTA) chuan, season hman zawh taka player ṭha ber an thlang chhuak a, a hming chu Iga Swiatek a ni a, world number 1 a nih bawk avangin lawmman dawn a phu hle.

Polish nula hian season duhawm a hmang, a zawna match 37 chak tluan lai pawh a nei hial. Kumin chhungin nomawi pariat a chawi a, heng zingah hian inelna ngaihhlut bik Grand Slam nomawi pahnih a tel.

French Open leh US Open title a lak bakah, inelna dang - Qatar Open, BNP Paribas Open (Indian Wells), Miami Open, Internazionali BNL d'Italia (Rome) leh Porsche Tennis Grand Prix (Stuttgart) te a tel a, a hrawl hlawm hle.

Kumina match 67 zet hnehna changtu Swiatek chuan, "Ka tan chuan hetiang chawimawina dawn te hi thil zahthlak a ni zawk, player ropui leh ṭha bik tak tak ten an dawn tura ngaih kha ka chungah a tla ve ta mai si," tiin a sawi.

Jessica Pegula-i enkawltu David Witt chu WTA coach of the year atan thlan a ni thung. Season tir khan Pegula hi world number 18 a ni, a coach Witt kaihhruaina hnuaiah nasa takin hma a sawn, kum tawp a nih meuh chuan a sang zual pathum zingah a tel phak.

Pegula hian Mutua Madrid Open final a lut a, Guadalajara Open Akron-ah champion in inelna ngaihhlut Grand Slam pali zinga pathumah quarterfinal a lut phak vek, atan chuan kum ṭha bik a ni chiang hle.

WTA Award 2022
Player of the Year: Iga Swiatek
Doubles Team of the Year: Barbora Krejcikova
Katerina Siniakova
Most Improved Player of the Year: Beatriz Haddad Maia
Newcomer of the Year: Zheng Qinwen
Comeback Player of the Year: Tatjana Maria