Gokulam an chak - beiseina an nei zel

Season tharah I League champion-in Indian Super League an khel dawn a, I League hmahruaitu nih inchuhna boruak pawh a sang zel - hmahruaitu Real Kashmir chak loh niah Gokulam Kerala an chak.

Thawhṭanni khan Roundglass Punjab chuan 2-1 in Real Kashmir an hneh a, zanah Gokulam Kerala inlan zui ve lehin Rajasthan FC chu 1-0 in an hneh.

Gokulam tan hian V.S. Sreekuttan chuan inkhela goal awmchhun a khung a, Rajasthan lamin a chhanletna tur an neih loh avangin Kerala club an chak.

Richard Towa enkawl Gokulam hian hnehna an chan avangin table-ah pahnihna an ni a, khelh zat inangah point hnih chiahin Real Kashmir an phak lo - an hnuaia awm Roundglass aiin point khat chauhin an sang thung a, match khatin an khel tlem bawk.

Chance hlah ve ve
Manjeri Payyanad Stadium-a inkhelah team pahnihin goal khung an harsat a, first half chhungin goal hmuh tur a awm lo - Rajasthan attacking midfielder Martín Chávesa hnawk tluan chhuak zak a, minute 20-na leka a chance neih a khung loh chu uiawm a tling.

Bektur Amangeldiev pawhin Rajasthan tan goal khungna remchang a nei a, mahse, Gokulam goalkeeper Shibinraj chuan ṭha zetin a lo dansak a, mikhual team an vannei tawk lo.

Gokulam hian chance nei lo an ni bik lo. Cameroonian striker Boum Somilaga chuan goal khung theihna remchang a nei a, mahse, Rajasthan goalkeeper A.S.Vishal chuan ṭha tak thoin a dansak.

First half-ah team pahnihin goal an khung lo a, chawlhlawk hmaa inkhel thununtu Rajasthan tan goal khung loa chawlhlawk hman chu a uiawm lehzual.

A tawpah Gokulam
First half-ah team pahnihin goal khung an harsat a, second half-ah erawh Gokulam-in goal khung tura nghah rei an tum lo. Minute 51-naah counter attack hmangin Gokulam hian an nawr let a, V.S. Sreekuttan chuan ṭha zetin goal a khung.

Gokulam-in goal an khung hnuah tlarhnung ven an ngai pawimawh zui a, Rajasthan-in point hlawhchhuah ngei tumin bei let mah se goal an khung thei lo.

Rajasthan tan Martín Chaves leh defender Aidar Mambetaliev ten chance duhawm nei mah se an si phurh sutna goal an khung thei lo a, hun tawp thlenga goal dang a luh loh avangin an tlawm.

Mikhual team Rajasthan tan Lalliansanga Renthlei leh F. Lalremsanga ten inkhel bul an ṭan a, South Indian club Gokulam-in Mizo player kawl an nei lo thung.