Lloris-a'n Kane a hnem

France captain Hugo Lloris chuan Tottenham tana a khelh pui Harry Kane chu World Cup aṭanga an tlak hnuah a hnem, atan hun harsa leh hrehawm tak a ni tih a hriatthiampui thu a sawi.

Kane hian Spurs keeper Lloris venah penalty a hlah a, an ram England chu 2-1 in France lakah chak loin an World Cup zinkawng a tawp nghal bawk - penalty hlawhtu Kane tan hun hrehawm tak a ni ngei ang.

Lloris chuan, "England national team leh a bik takin Kane tan hun harsa tak a ni ang, inkhelh zawh khan kan inbia a, sawi tur a vang hle. Ka hmuh dan chuan hahchawlh a mamawh rih, a vanduai zawkah ṭang mah se ram tana a thil tih tawhte avangin a inchhuang hle turah ka ngai.

"Football-ah chuan player ropui leh ṭha tam takin penalty an lo hlah tawh ṭhin. Lionel Messi leh Cristiano Ronald te ngei pawhin penalty an hlah tawh. Harry pawhin Tottenham leh England tan tun aia ṭha zawkin a la khel leh ngei ang," tiin a sawi.

Kane hi player ṭha bik zinga mi a ni a, mahse a khelh mekah Spurs hi hlawhtlinna a la chanpui thei lo. Three Lions tan pawh match 80 aṭangin goal 53 a khung, ram tana goal khung hnem lamah Wayne Rooney nen an intluk a, nomawi erawh a la chawi lo thung.