Railway unit hnuaiah hna thawh theih dawn rih lo
Ram chhunga railway unit zawng zawng hnuaia hna thawh turte chu tihtawp lailawk a ni tih Indian Railways-a Railway Board chuan a tarlang.
Hna thawh tur tihtawp lailawk a nih rual hian Covid-19 hri hluar lohna hmuna rel tlannaahte chuan hna thawk thei tura tih a ni thung a, mahse loh theih loh thil chiah phal a ni ang. Hna thar/umbrella work-a project leh Pink Book 2020-21 hnuaia hna thawh turte chu tihtawp lailawk a ni a, hei hi Covid-19 hri leng vang a ni.
Kum 2018-19 leh 2019-20 a umbrella work-a project chu titawp lailawk a ni a, financial year 2020-21 chhunga scheme thar thawh turte pawh nakkum March 31 thleng tihtawp lailawk a ni bawk. Railway zone zawng zawngah Railway Board thuchhuah hi pek a ni a, thu leh awm hma hna thawk rih lo tura an ngenna chu zawm turin an hriattir nghal bawk a ni. March 22 aṭanga rel a tlan mumal theih loh avangin Indian Railways chuan cheng vaibelchhe 40,000 a hloh tawh a ni.
June thla khan finance ministry lamin railway lam hi sorkar sum hman dan chungchang an hriattir a, hetah hian mipuite hamṭhatna tur atana sorkarin hna thawh tur a duan pawisa ruahmante chu Covid-19 leng vangin hman pen a ngaih thu tarlan a ni. Hei vang hian Railway lam chuan an hna thawh tur ṭul zual lo chu a tihtawp lailawk a ngaih phah ta a ni.