Scaloni hnuaia danglamna

Argentina-in kum 2014 khan Alejandro Sabella hnuaiah World Cup final a thleng a, tunah Lionel Scaloni hnuaiah final an thleng leh ta. La Albiceleste hi final luh leh luh inkarah hian an inthlak danglam nasa hle.

World Cup 2014 zawhah Sabella chu Gerardo Martino-a'n (2014–16) a rawn thlak a, Edgardo Bauza (2016–17) leh Jorge Sampaoli (2017–18) te an rawn lang bawk. Russia rama World Cup khelh a nih ṭum khan Sampaoli hoin an khel a, ani hi coach atana Scaloni chher hriamtu a ni.

Scaloni hian October 11, 2016 khan Sampaoli hnuaia inchher hriam turin Sevilla coaching staff zingah a tel. June 2017 khan Sampaoli hian Argentina enkawl hna a ṭan a, Scaloni hi assistant coach a ni zui. Kum an vei a, World Cup-ah France hneh loin an tla a, Sampaoli hmunruak luah turin Scaloni leh Pablo Aimar te chu ruat lailawk an ni. November 2018 khan Scaloni hi Argentina coach ni turin an nemnghet.

An thlang fuh

Scaloni hian tawnhriat a nei ṭha tawk lo a, amaherawhchu danglamna a thlen tih erawh a chiang. Kum 1993 hnua a vawi khat nan kum 2021 khan Argentina chu nomawi a chawipui a, Copa America-ah an champion. Coach langsar zawk Marcelo Bielsa, Alejandro Sabella, Gerardo Martino leh Sampaoli te chauh ni loin te theih loh a ni.

A tirah tak chuan Argentina duh ber chu Scaloni a ni lo a; coach langsar zawk Mauricio Pochettino (Tottenham a enkawl lai ), Diego Simeone (Atlético de Madrid) leh Marcelo Gallardo (River Plate) ten team enkawl lai an nei vek.

Hemi a nih avang hian tawnhriat a la nei ṭha lo Scaloni chungah rinna an nghah a ṭul phah. Scaloni hian Mallorca Under 17 a enkawl tawh a, Sampaoli assistant niin training a kalpui ve tawh bawk. Chutihrualin player ang chuan tawnhriat a nei pangngai a, Argentina tan ṭum sarih khel tawhin 2006 World Cup-ah khan Lionel Messi ten ram tan an tel.

Record enin chhuanawm viau lo mah se Scaloni hian danglamna a rawn thlen a, Copa America 2019-a pathumna a nihpui bakah kum 2021-ah a champion pui bawk. Hei chauh hi a la ni lo, June 1, 2022 khan 2022 Finalissima-ah hnehan a chang. He inelna hi European champion leh South American champion inelna a ni a, Wembley Stadium-ah Italy chu 3-0 ngawtin an sawp.

Team a din

Argentina-in kum 2006 World Cup aṭangin Messi an nei tawh a, 2014 World Cup final an thleng tih loh chu semifinal thlen phak an nei lo. Kum 2018-ah phei chuan last 16-ah an tla a, Argentina hian indinthar an mamawh hle.

Scaloni hian World Cup 2018 rinrawl Javier Mascherano a nei tawh lo a, tlarhma lamah Lionel Messi chu hmun pawimawhah dahin tlarhnungah Nicolás Otamendi chu rinrawl a ni thung.

Messi hi 2019 Copa America pathumna zawnnaah hnawhchhuah a ni a, hemi chiah hi Scaloni hnuaia inelna lian an hmachhawnah khelh tluan loh a nei. Chutihrualin Sampaoli hnuaia World Cup 2018 an khelh ṭum pawhin a khel tluan.

Scaloni hian Copa America 2021 aṭangin Emiliano Martinez chu rinrawlah a dah chho a, Aston Villa keeper hi Argentina kulhpui pawimawh a ni zui. Defence laiah Otamendi kawppui tur a zawng a, Spurs defender Cristian Romero chungah rinna a nghat. Romero thlak thei tur hian Lisandro Martínez leh Germán Pezzella te an awm.

Mual vei lamah Nicolás Tagliafico aiin Marcos Acuña a ring hret a, chutihrualin player pahnih an rintlak ve ve. Mual dinglamah Nahuel Molina a awm a, a thlakna turin Gonzalo Montiel a awm. A tawi zawnga sawi chuan Argentina hian World Cup hmaa Copa America ṭum hnih an khelh avangin tlarhnung position tinah a 'set' kimin player an nei.

Midfield lamah Copa America an champion ṭuma hmun pawimawh chang tawh Rodrigo De Paul a la pawimawh reng a; Brighton midfielder Alexis Mac Allister leh Benfica midfielder Enzo Fernández ten inelna an hman ṭhat zarah semifinal-ah meuh chuan player pawimawh an ni tawh. Chutihrualin team khelh dan nghet sa beltu Leandro Paredes leh Papu Gómez te eng hunah pawh chhawr tlak reng an ni.

Tlarhma lamah Messi a pawimawh a, Lautaro Martínez erawhin a hun ṭha bawhpelh avangin Manchester City forward Julián Álvarez-a'n hmun pawimawh a chang ta. Alvarez hi a khel ṭha ta lo a nih pawhin Lautaro Martinez chauh ni loin Ángel Di María pawh a la awm.

Argentina team hi a chhe hauh lo a, chutihrualin Messi hnaih an awm meuh lo. Nicolás Otamendi pawh kum 34 mi a ni tawh a, a vanglai a pel tawh (Messi pawh kum 35 a ni tawh a, mahse Messi a ni tlat) avangin Champions League beisei pha Europe club lianah a khel pha lo. Alvarez pawh che ṭha viau mah se Man City-ah chuan Erling Haaland thachhang dawltu chauh a ni.

Kumin Argentina team danglamna chu Scaloni-a'n 'TEAM' a din vang a ni a, final meuh thlen nan team ringawt a la tawk lo - Messi-a'n a vanglai hun a hmang ṭha leh bawk.