World Cup final-ah Argentina an lut

Lionel Messi-a'n football thiam chungchuang bik a nihzia a lantir a, an khingpui Croatia chu a tuartu an ni. Argentina chuan Messi leh Julian Alvarez te goal hmangin Croatia 3-0 in an hneh, nuamsa angreng takin Qatar World Cup final an lut.

Footballer ropui bik Messi hian a football zinkawng ti famkim turin hmabak pakhat a la nei, match khat an chak leh a nih chuan a hlen chhuak ang. France leh Morocco inkhela chak zawk nen Pathianni zanah ennawm ropui hmawr an bawk ang.

Messi hming a ri ring a, he tih rual hian Alvarez hming lam hmaih a thiang lo. Manchester City forward hian Messi khung tur penalty a hlawh chhuak, an goal hnuhnung pahnih chu a khung a ni bawk - tha thawhtu pawimawh a ni chiang hle.

A hming Messi

World Cup ṭan hma aṭangin Messi thawm a lian nghal a, an ram inkhel enna tur ticket chu hralh kal ber a ni ngar ngar. Argentina chauh a ni lo, khawvel ram hrang hrang aṭangin Messi inkhel en tur leh, a boruak tem turin Qatar pantu an ṭhahnem hle.

Thawhlehni zan Lusail Stadium-ah mipui an khat hneh hle a, a tam zawk chuan Argentina jersey an ha. Inkhel ṭan hma aṭangin thawm a ring nghal hle a, ball an pet tirh lamah erawh Croatia lamin Luka Modric leh Mateo Kovacic te hmangin midfield an thunun angreng viau.

Lionel Scaloni-a'n Argentina team a din tirh aṭanga a khelh tir dan phung a la danglam lo, tlar hnung ti phui hmasain remchangah an nawr let ṭhin, an kalphung pangngai hi Croatia lakah pawh an hmang chhunzawm zel.

Minute 34-naah counter attack aṭangin na takin an nawr thut, forward Alvarez-a'n Croatia goalkeeper Dominik Livakovic paltlang a tumna lamah an insu tlu a, a ball pet hi goal-ah lut lo mah se penalty a hlawh chhuak.

A pet turin Messi a rawn ding chhuak, quarterfinal-a Brazil player ti hrilhhaitu keeper Livakovic a inringtawk tih a chiang a, mahse a hma a ding kha Messi a nih avangin atan tih theih a awm lo, chiang zetin goal khatna a lut.

A thiam

A kum a tam deuh tawh a, kumin bak chu Messi-a'n World Cup a khel dawn tawh lo. Kum 35 mi ni tawh mah se a ke leh ball a la inzawm tlat, South American ramin goal an nawr chu an captain ke aṭanga bul ṭan a ni deuh zel.

Argentina chet fuh vawi hnihna erawh counter attack aṭang bawkin a ni. Kum 22 mi Alvarez-a'n half way line bul aṭangin ball a tlanpui a, a paltlang turah Croatian defender pathum an awm avangin thil harsa tak tura ngaih a ni, mahse a paltlang fai vek!

A la tawp mai lo, mual sirah Messi-a'n amah vengtu defender Josko Gvardiol a vir khum! Kum 20 mi Gvardiol kha thahrui nei ṭha leh tun World Cup khel ṭha bikte zinga mi a ni, mahse chiang zeta a vir khum hnuah hnai taka ball la lutin Alvarez tan a siamsak - kha mah mah a ding lam lehnghal.

Tlar hma chauh ni loin Argentina tlar hnung lamin hna an tlin ṭha viau. Hrem vangin Marcos Acuna leh Gonzalo Montiel te chhawr thei lo mah se, a lai bakah a sir a phui ṭha hle - an khingpui kha goal an khung tir loh bakah hun ṭha an siamtir lo tluk a ni.

Duhthusam loh leh siam rem ngai lai chu a la nei nual ang, an match hmasa berah phei chuan Saudi Arabia an hneh lo a nih kha. A hnu lama an thawh leh dan erawh a nep lo, a hmawr bawk turin inkhel hautak an hma hmabak.

Beiseina chu

Messi-a'n a malpui a dawm a, kha tih lai khan minute 19-na lek a la ni. Stadium chhunga inkhel entu bakah TV lam aṭanga entu, a bik takin Argentina ṭantute an hlauthawng, mahse an hlauhthawn ang erawh a ni lo hlauh.

Argentina hian kum 1978 leh 1986 khan World Cup nomawi an chawi, an champion hnuhnung zawk hian legend Diego Maradona-a captain-na hnuaiah a ni a, tun thlengin a sulhnu zui leh thei an la awm leh rih lo.

Messi hun a inher chhuak a, final an luh hmasakah an champion zo lo. Kumin hi an tan hun ṭha bik a ni leh mek, football inelna ngaihhlut hlawh berah Messi hian goal 11 a khung tawh a, an ram tana khung hnem ber a ni - nomawiin a zui chuan a hlu zual ang.

Germany captain hlui Philipp Lahm chuan, "2014 khan chuan Argentina hian Messi chu thil mak tihsak turin an beisei tawp a ni ber a, tunah chuan atan an khelhsak tawh," tiin a lo sawi tawh, an captain tan player zawng zawngin nomawi chawi an chak zual.

Pen khat a la ngai
- Scaloni

Argentina coach Lionel Scaloni chuan awlsam taka Croatia an hneh loh thu a sawi a, an hmabak World Cup final khel turin rilru zawng zawng an sen nghal a ngaih thu a sawi chhuak bawk.

Scaloni chuan, "Goal khung zat khan inkhel a hrilhfiah kher lo mai thei, chak phu zawkin kan khel ngei tih chu ka pawm. Mahse goal thum faia kan chak kha chu thil lawmawm lam a ni thung.

"A bik takin first half-ah phei kha chan inkhel an thunun zawk, midfielder ṭha bik pathum an nei a, anni khan hun rei tak lo khel ho tawh an nih avangin thil mak pawh a ni hran lo, khatiang hmachhawn tur khan kan inbuatsaih lawk.

"Penalty khan kan tan kawng a rawn hawng, a hnu lamah erawh kan duh angin kan khel chhunzawm thei," tiin penalty chu an chak theihna hnar a ni tih a pawm a, a thusawi hi mi tam takin an pawmpui ngei ang.

Kum 44 mi Scaloni hian an ram hi Copa America nomawi a chawipui tawh a, tunah chuan an khelh hmabak pakhatah an chak a nih chuan World Cup champion an ni der dawn, pen khat an pen a la ngai.

Tun hmain Argentina hian World Cup final vawi ruk an khel tawh, vawi hnih an champion. Final luh ringawt hi nomawi chawina a la ni mai lo tih an hriat a ngai, team 32 inlan zinga final thleng phak dang nen an inkhelh dawn avangin hna hautak thawk tura inrin a ngai ang.

Saudi Arabia hneh lotu kha...

Argentina hian inrintawkna sang tak nen Qatar World Cup an khel, mahse an match hmasa berah Saudi Arabia 2-1 in an hneh lo. Lionel Messi chuan a tira an chak lohna khan chakna thahruai a siamsak thu a sawi.

Kum 35 mi Messi chuan, "A zawna match 36 tlawm lo chungin Saudi Arabia kan hmachhawn a, goal kan khung hmasa bawk, harsa vak loa chak thei turah kan inngai hman, mahse chutiang ngawt chu a lo ni si lo.

"Kan chak loh chhan kha chiang taka sawi vek sen pawh a ni lo ang, mahse kha chak lohna khan nasa takin kan rilru a ti paukhauh a, ṭha leh zual zawka khelh duhna thinlung min pe," tiin a sawi.

Saudi Arabia an hneh loh hnuah Mexico leh Poland te group match-ah an hneh zui a, chumi hnuah Australia, Netherlands leh Croatia te an hneh leh tawh, heng inkhelah hian a chak zawk ni satliah loin a chungnung zawk an ni tel thei zel.

Tournament ṭan hma khan Messi hian atana World Cup hnuhnung ber a nih tur thu a sawi lawk, final an luh hnuah hemi chungchang zawhna hi a dawng nawn. Messi chuan, "Ka tana World Cup zinkawng chu final kan khelh zawh rualin a zo ang.

"Hetiang thlenga kan kal thei hi ka lawm, mimal record leh lawmman hi chu a pawimawh ber a ni lem lo, a pawimawh zawk chu thawhhona ṭha tak hnuaiah nuam ti taka kan khel thei hi a ni.

"World Cup champion nih hi kan duhthusam a ni a, hun rei tak chhung kan lo suangtuah tawh hi a taka a thlen dik theih nan kan theihna zawng zawng kan hlan ang," tiin a sawi a, atan chuan Qatar World Cup hi match pawimawh bera tia sawi ngam a ni ang.