Croatia leh Modric an her liam ta

Player ṭha an awm a, thiam bik an awm leh a, hruaitu ropui an awm bawk - heng zawng zawng hi Luka Modric nihna a ni vek. Croatia midfielder ropui Modric chuan ram atana World Cup a khelh hnuhnung ber chu a khel zo ta.

Croatia captain hian Brazil an hneh ṭum khan, chak lo lam player langsar Neymar chu a hnem - hei hian mipui thinlung a hneh. Argentina an hneh loh ṭum erawhin amah chu hnem ngai zawk a ni, khelmuala Angel di Maria-a'n a rawn kuah zet kha chu fans lam pawhin an lawm hle.

Lusail Stadium-ah Modric hian midfield a thunun leh viau a, a ke aṭangin ball hlauhawm a chhuak zauh zauh bawk. Mahse, vannei taka World Cup an khelh mek chu an chhunzawm reng thei bik lo, mittui nen Qatar an chhuahsan a ngai.

Final lut phak lo mah se Zlatko Dalic-a enkawl Croatia hi an thlen chin a nep lo, a bik takin world champion vawi nga ni tawh Brazil lakah si phurh sutin an hneh zui thei a, an player neih dan chhut phei chuan thleng sang tak an ni.

Kum 37 mi Modric-a'n World Cup lehpek a khelh dawn tawh lo a, 2024 European Championship erawh a la khel mai thei! Coach Dalic chuan, "Tuna kan player ṭhenkhat tan hi chuan World Cup hnuhnung ber a ni tawh.

"Vanglai a rei lo a, kum 2026 a nih meuh chuan an tha pawh a ṭhum ve tawh ang. Mahse, Nations League khelh chhunzawm tur kan nei a, tun aṭanga rei vak loah Euro 2024 a lo thleng dawn," a ti a, an captain chu khel chhunzawm rih se a duh.

A contract chungchang sawi zuiin Dalic chuan, "Tuna ka contract neih lai hi kum 2024 thleng a ni a, ka hna ngai ka thawk chhunzawm ang. Euro 2024 hi tuna ka player ṭhenkhat tana zinkawng tawp hun a nih zawk pawh ka beisei.

"Chak lo mah ila tournament a la zo lo, pathumna inchuh tur atan rilru kan seng ang. Ka naute rilru a nain a hrehawm an ti takzet a, chu tih rualin kan thlen chin hi ngun taka chhut chuan a chhe lo, inchhuang taka awm tur zawk an niin ka hria," tiin a sawi.