Fak zai a fawn vel e; a hming chu Messi!

World Cup semifinal-ah Argentina-in 3-0 in Croatia an hneh a, Lionel Messi 'show' tih ngam khawpin Argentina captain khel a hmuhnawm a, kil tinah a fakna thu a thang vel a ni ber!

Kum 35 mi Messi hian penalty aṭangin goal a khung a, mahse, hei ai maha sawi hlawh zawk erawh Julian Alvarez tana goal khung tur mawi lutuka a siamsak chu a ni - mawi lo ti fa tu nge awm thei ang?

Messi hian senior football-ah match 1,002 zet a khel tling ta a, penalty kha a goal 791-na a ni a, Alvarez khung tur a siamsak kha a assist 340-na a ni chiah bawk.

Barcelona tan nomawi 35 chawi tawhin, season hmasa khan Paris St-Germain tan league nomawi a chawi a, Argentina tan Copa America nomawi a chawi tawh bawk - a hmabak chu World Cup a ni ta.

Aw ropui ber

Liverpool defender hlui Jamie Carragher chuan, "Messi, khawvel footballer awm tawh zinga ṭha ber a ni," tiin twitter lamah Messi a fak a, Barcelona legend aia player ṭha zawk awm theiah a ngai.

England legend Alan Shearer chuan, "Maradona leh Messi khaikhinna a tawp phah ang em? Messi hian World Cup nomawi a chawi a nih ngat chuan a tawp mahna - chu chu he player danglamna chu a ni.

"Maradona chuan World Cup nomawi a chawi tawh a, Messi hian a chawi ve a nih ngat chuan ka ngaihdan ka thlak tawh ang," a ti a, Messi chu ropui bera a ngaih tur thu a sawi.

Messi hian World Cup-ah goal 11 khung tawhin, Argentina tana World Cup-a goal khung hnem ber a ni mek a, World Cup pangaa assist nei thei ziah awmchhun a ni a, kum 20 tlin hman, kum 20 chho leh kum 30 pelh hnua World Cup-a goal khung vek thei awmchhun a ni bawk.

Chhanna dang a awm lo

England legend Gary Lineker chuan, "Khawvela footballer ropui berah hian inhnial a la ngai cheu em ni?" a ti a, Messi chuan ropui ber dinhmun chu chuhtu nei loin luah tawh mai se a duh!

Messi hian kum 2014 khan World Cup final a lo khel tawh a, mahse, Germany lakah an tlawm - heti chung hian Messi-a'n Golden Ball a dawng a, tun World Cup-ah champion nomawi, Golden Ball leh Golden Boot dawng vek thei dinhmunah a ding mek.

Argentina boss Lionel Scaloni chuan, "Khawvela ṭha ber a ni, tih chungchangah hian rinhlelhna ka nei ngai lo a, rei tak ka lo sawi tawh zawk a ni. Messi train lai ka hmu thei hi ka lawm a, a chungchangah hian sawi belh tur chuang a awm lo - he squad-a amah ka nei thei hi ka lawm a ni," a ti.

England keeper hlui Rob Green chuan, "Messi hi khawvela ṭha ber nih nge a duh, world champion medal tiin zawt ta ila, lawm takin medal a la ang. World Cup nomawi a chawi miau chuan khawvela ṭha ber a ni, tih hi pawm a ni nghal dawn a ni - football tana a hnathawh hi a ropui a ni," tiin a fak.

Fak a ṭul leh ṭhin

Messi hian Pathianni zanah World Cup final a khel thei a nih chuan World Cup-a match 26 a khelhna chiah a ni dawn a, Lothar Matthaus record ding lai chu tlan pelin World Cup-a match khel hnem ber a ni dawn.

Shearer chuan, "Argentina hian Messi vangin final an khel dawn a ni. Mi zawng zawngin amah hi an thlir a, tun hma ang khan a thawkrim tawk tawh loin, a che rang tawk tawh lo a ni mai thei.

"Mahse, kha 'magic', duh ang thala defender-te chhaih kual a, bum chunga tlan theihna ang kha a la nei reng. Khawvela ṭha ber berte pawh player vantlang ang maiin a la chhuah thei tlat a ni," a ti!

Messi chuan, "Nuam ka ti takzet a, match zawng zawng khel tur khawpin ka inpeih a ni. He World Cup hi nuam ka ti a, ka ṭhiante ka pui thei hi ka lawm hle," tiin a sawi.

En teh, ka ṭhian...

Barcelona tana a khelhpui ṭhin leh, Messi ṭhian ṭha Luis Suarez chuan instagram lamah a ṭhianpa a lawmpuina a lo tarlang ve bawk a, Uruguay legend chuan, "Khawvela ṭha ber i ni tih pholan hi i ṭhulh thei lo a nih hi," a ti!

Argentina tana Messi khelhpui ṭhin Pablo Zabaleta chuan, "Messi a hmuhnawm takzet - ball a inherpui dan kha in lo hmu em? Hmun awl hman a thiam a, box chhung a awm chuan hnaih chilh kha kan duh lo tawp a ni.

"Alvarez khung tur a siamsak kha a pui takzet a, goal ropui a ni. Messi-a'n ball a chan tawh hi chuan thil engemaw tak chu a thleng dawna hriatna hi a awm tlat a ni," a ti a, Messi a fak hle.

Croatia manager Zlatko Dalic pawhin chhuanlam a zawng lo - World Cup 2018 final-a a team lo hruai thleng tawhtu coach chuan, "Messi chungchang hi sawi belh tur vak a awm lo. Khawvela footballer ṭha ber khe a khel ṭhain, a hlauhawm em a nih kha - kha Messi kha hmuh kan beisei sa a ni," a ti.

Messi World Cup

Argentine chanchinbu darhzau ber Clarin chuan, "Final-ah eng pawh thleng se, tun hi chu Messi World Cup a ni tawh a ni," tiin an ziak hmiah tawh - khaw dang an hawi thei tawh lo!

Argentina infiamna chanchinbu lar Ole chuan, "Argentina chuan number 10-ah player dangte tih ve theih loh titheitu an nei a ni," an ti a, an ram fapa rangkachak chu an chhuang thiam hle.

Spanish chanchinbu lar Mundo Deportivo chuan a duh tawka Josko Gvardiol a bum vel chu, "Engtinnge a tih theih zawk?" an ti a, "World Cup chanchinah hriat reng a ni tawh ang," an ti zui.

Marca chuan, "Midangte tana entawn tur hnutchhiahtu," an ti a, Catalonia chanchinbu darhzau ber La Vanguardia chuan, "Rei tak a nghah chu Pathianni zanah chinfelna remchang a nei dawn a, Diego nen an ṭhu dun thei ang," an ti a, Pathianni zanah kan hria ang.