Belgium-in coach thar an zawng

Roberto Martinez-a'n Belgium coach hna a chawlhsan hnuah Red Devils chuan a hmun ruak luah tur an zawng nghal a, Royal Belgian Football Association chuan, "Hnehna chan dan hria kan duh a ni," a ti.

Belgian FA chuan, "Level sang bera international football tawnhriat nei, football kalphung leh a chhung ril thlenga hretu, skills nei sang tak kan duh. Top player enkawl thiam, hnehna chan thiam mi ni ngei se," an ti a, an duhtui hle.

Football khawvela hming langsar tak tak, Manchester City midfielder Kevin de Bruyne, Inter Milan striker Romelu Lukaku leh Real Madrid keeper Thibaut Courtois te neitu Belgium-in coach an duhtui hi a awm lo hran lo.

Belgian FA hian coach tur chu, "Player naupang zawk enkawl thiam, team inlungrual tak din thei tur," ni se an duh thu an sawi bawk a, tunlai technology nen ṭang kawpa team din thiam leh Belgian FA nena thawk ho thei tur an duh thu an sawi tel bawk.

Belgium hian World Cup 2018-ah khan pathumna dinhmun an luah a, mahse, tun World Cup-ah goal khat chauh khungin group stage pawh an paltlang zo lo - Belgium coach hna hi January 10, 2023 thleng a dil theih.

Kum 49 mi Martinez kha kum 2016 khan Belgium enkawl hna thawk tura rawih ṭan a ni a, September 2018 aṭanga March 2022 thleng world ranking-ah number 1 ni thei mah se nomawi liantham chawipui a nei lo.

RBFA chuan, "Qatar World Cup-ah khan hma takah tla mah ila, RBFA chuan hmathlir thui tak a la nei reng tho a, kan hma huna kan hlawhtlin theih nan engkim fel taka ruahman sa vek a ni.

"Coach thar chuan he ruahmanna hi kalpuiin, hlawhtlinna thar chang turin min pui dawn a ni," an ti a, hetihlai hian Belgian footballer langsar ber zinga mi Eden Hazard-a'n ram tana inkhelh a chawlhsan tawh avangin Belgium team 'tharah' chuan Hazard a tel tawh lo ang.