Sancho inkhelh hun tur a la chiang lo

Manchester United manager Erik ten Hag chuan a player Jadon Sancho chu engtik hunah nge a chhawr leh theih ang tih a la sawi thei lo, a taksa bakah rilru lam a inpeih hmasak a ngai tih a sawi bawk.

Kum 22 mi Sancho hian season bul kha a ṭan fuh. September thlaa international break an neih hma khan goal thum a khung hman, mahse favang laiin a che fuh hleithei lo a, an ram England tan World Cup pawh a khel phak lo hial.

Man United manager Ten Hag chuan, "A nihna tak sawi chuan inkhel turin a fit tawk lo a, a taksa bakah a rilru a inpeih lo. Jadon nen hian kan in be fo, a rang thei ang bera inkhel leh turin ka duh, mahse a hun chu ka sawi thei lo," tiin a sawi.

Dutch coach duh dan angin Sancho hi mimal training neih tir a ni a, an lakluh tirha an duh leh beisei ang kha chu a la thleng mai thei dawn rih lo niin a lang, a tan season chawhnu lam hi insiamṭhat theihna hun remchang a nih a rinawm.

Sancho hian 2021 khan Borussia Dortmund aṭangin Man United a zawm, pound maktaduai 73 man teh meuh a ni. Euro 2020 khan Gareth Southgate-a'n remchang a siamsak a, mahse rinrawl a ni phak lo.

World Cup khelh loh chungchang sawi zuiin Ten Hag chuan, "England tana khel phak tur chuan inelna a hautak hle. World Cup-ah phei chuan match zawng zawng a hautak, chuvangin inkhel bul ṭan tur pawh hriatthiam a harsa ṭhin.

"Kar tin Premier League kan khel a, khang inkhelah khan ram tan khelh ka phu a ni tih i lantir thei lo a nih chuan World Cup a khelh theih loh," tiin a sawi a, a player chu club tana khel ṭha turin a duh.