Ben White lakah buaina ka nei lo - Arteta

Arsenal manager Mikel Arteta chuan Ben White nen an inkarah buaina a awm ve lo tih a sawi a, a defender chu Premier League khel leh nghal thei tura a inbuatsaih thu a sawi chhuak bawk.

Ben White hi World Cup khel tuin England tan koh a ni a, inelna neihna hmun Qatar pawh a pan ve ngei. Mahse, tournament khelh laklawh laiin squad a chhuahsan a, team thuneitu lam nen buaina an nei nia sawi a ni.

England international hian Arsenal training a zawm nghal. AC Milan nen Dubai-a friendly match an khelhah pawh a inlan nghal a, a club hi 2-1 in hnehna a chanpui, an ram team a chhuahsan chhan kha hliam vang a ni lo.

Gunners manager Arteta chuan, "Ben a khelh danah ka lawm, kei leh club chhunga awmte zawng zawng chuan ka thlawp tlat, chu chu tun huna a mamawh tak ni pawhin ka hria. Inkhel leh nghal theia a lo kir hi kan tan a lawmawm zual," tiin a sawi.

White bakah hian Thomas Partey pawhin Arsenal training a zawm leh tawh. Ghana international midfielder hian match a khel leh tawh a, he tih lai hian United States goalkeeper Matt Turner erawh kir leh tawh mah se a la inkhel rih lo thung.

Arteta chuan, "Kan player zinga World Cup khel zawng zawng ka be vek a, an dinhmun dik tak pawh ka hre kim. Club pawn lama an chet dan leh nungchang chu ka thunun theih piah lam a ni, ka kianga an awm chuan buaina kan nei lo," a ti.

Premier League hmahruaitu Arsenal hian December 17, Inrinni zan hian Juventus nen friendly match an khel leh dawn. December 26, Thawhṭanni zan laiah league match khel turin West Ham an mikhual ang.