Odisha tan insiamrem hun a thleng

Indian Super League-a an match hnuhnung berah Odisha an mualpho a, an mikhualna ramah FC Goa chu 3-0 in an ngam lo - top four pawnah an awm phah.

Mahse, zanin dar 7:30-ah Odisha hian an tihsualte siamremna remchang an nei dawn a, ATK Mohun Bagan an mikhual dawn - mahni muala khel tur an nih avangin chak an beisei ang.

Chutihrual chuan Kolkata club laka chak hi Odisha tan thil awlsam a ni dawn lo. Bagan hian table-ah pathumna dinhmun luah mekin, Odisha aia an sanna chu point khat chauh a ni.

Bagan tan vawi khat chetsualah, top four pawna awm theih a ni a, hei vang hian chetsual a thiang lo - thil mak danglam ve tak chu, Bagan hian Odisha sawp hlim FC Goa chu tun season ISL-ah 3-0 vekin an lo ngam lo ve tawh!

Mahse, Goan club an ngam loh hnuah Juan Ferrando naute an insiamrem lehnghal a, league match thum chu a zawnin Hyderabad FC (1-0), Bengaluru FC (10) leh Jamshedpur FC (1-0) an hneh tawh.

Odisha erawh Goa laka an tlawm khan match thum a zawna an chak tawh chu tihtawp a ni a, zaninah insiamremna hun an nei dawn - an tih theih dawn leh dawn loh chu zaninah hriat a ni dawn.

Zanina club pahnih inlan turah Odisha-in Mizo pariat ngawt kawl mah se Jerry Mawihmingthanga leh Isaac Vanmalsawma chu hmun pawimawh chang phak an ni a, Bagan-in Lalrinliana Hnamte an kawl thung - Terina hian bul a ṭan a rinawm lo.