Morocco tana dan zawh loh Feren ram ropui

World Cup semifinal an khelh hmain Morocco-in goal khat chiah an chhuah a, chu pawh an defender ṭha Nayef Aguerd-a'n an lama a tihluh palh a ni - Nilaini zan a thlen hma thleng kha chuan Morocco tlarhnung phuizia a ni, an sawi ni.

Mahse, Morocco-in France an tawn meuh chuan an ding khawng reng thei bik lo a, Feren ram ropui hmaah an tlawm - Nilaini zan khan France hian 2-0 in Morocco hi World Cup semifinal-ah an hneh a, final-ah Argentina nen an intawng dawn.

France tana goal khungtu erawh Kylian Mbappe leh Olivier Giroud ni loin, Theo Hernandez leh substitute Kolo Muani te an ni a, Morocco-in chance nei ve bawk mah se a chhanletna tur an neih loh avangin an tlawm.

Pathianni zan dar 8:30-ah France-in Argentina nen world champion nih an inchuh ang a, Inrinni zan dar 8:30-ah Croatia leh Morocco te pathumna inchuhin an inkhel ve leh thung ang.

Beisei loh

France boss Didier Deschamps-a'n semifinal match pawimawhah rin loh takin player a rawn siksawi a, a duh thlanna erawh a ni bik lo - damlohna avangin centre back Dayot Upamecano leh midfielder Adrien Rabiot a chhawr thei lo.

Upamecano aiah Liverpool centre back Ibrahima Konate a lut a, Rabiot aiah Youssouf Fofana a lut bawk. Inkhel ṭantir aṭangin Morocco fan-ten boruak an siam thiam a, an thawm ringawt pawh France player-te tan zampui tham a ni.

Mahse, Les Bleus player-ten tawnhriat an nei ṭha tawk a, world champion lai an nih miau avangin fans au thawm hmaa zam mai mai tur an ni lo - minute ngana lekah goal an khung nghal.

Antoine Griezmann-a siamsak Mbappe-a shot chu Morocco lamin lo dang per hman mah se a per lehlam hi Theo Hernandez chuan boruaka invawrh kang chungin goal-ah a chantir a, Morocco goal-ah tun World Cup-a a vawi khat nan an khingpui lamin goal an khung.

Kha mah mah!

Morocco-in goal an chhuah hma a, zawhna chu, "France-in goal eng zat tak khung belh ang maw?" tih chu a ni a, mahse, Morocco an ṭang khawng tlat - an nawr let a hlauhawm tel a, France an him lo.

Mahse, Morocco-in an ruahman angin an khel thei bik lo. Minute 21-na lekah hliam dam kawr Romain Saiss a inhliam leh a, an defender pawimawh hi lakchhuah a ṭul a, minute 45-naah hliam dam kawr ve tho Noussair Mazraoui lakchhuah a ngai bawk.

Morocco hian chance erawh an nei ve tho a, a bik takin Jawad El Yamiq-a overhead kick France keeper Hugo Lloris leh goal post-in an lo dan hman chu uiawm tak a ni - goal ngat se, World Cup goal mawi bik zinga chhiar tel tlak a ni.

France-in goal khat nei mah se thlamuangin an khel bik lo a, Ligue 1 club Angers midfielder Azzedine Ounahi-a shot Lloris-a'n a lo dante pawh uiawm a tling a, France tlarhnung tan Konate a khel ṭha takzet bawk.

A ṭha zawk

Morocco-in goal an chuah hma avangin tlarhnung ringawt an ngaihtuah thei lo a, hei hian France lakah chance a siamsak nual - chutihrual chuan Les Bleus chance neih zozai kha thai bo theih a ni bik lo a, an vanneih zan ni se goal thum tal an khung ang.

France tan tun World Cup-a goal li khung tawhtu Olivier Giroud-a'n post a pet perte chu uiawm tak a ni a, tlarhmaa player hmuhnawm Mbappe chu Morocco tlarhnung tan a hnawk tluan chhuak zak bawk.

Minute 79-naah France zawkin goal an khung belh ta nge nge - Mbappe-a'n ṭha zeta ball a lam luhpui hnuah a shot chu lo dan per ni mah se, a per lehlam hi bench aṭanga lut hlim Kolo Muani ke bulah a tla a, Eintracht Frankfurt hian a ball tawh hmasak ber chu goal-ah a chantir.

Morocco-in si phurh sutna remchang la nei mah se hun pek belha Abderrazak Hamdallah-a khung ngei tura lang chu, France defender Jules Koundé chuan goal line-ah a lo dang hman a, 2-0 in France an chak.