France President-in Deschamps cham turin a duh

Les Bleus-in World Cup final a zawnin an lut a, France president Emmanuel Macron chuan an coach Didier Deschamps chu contract thar ziak tura a duh thu a sawi.

Kum 54 mi Deschamps hian tun thlaah a contract hi a hmang zo zui dawn a, Zinedine Zidane chuan Les Bleus hi a enkawl chhunzawm dawna sawi thawm a ring hle.

Mahse, Macron chuan, "Deschamps hian final pathum min hruai thleng ta a, hnehna a chang ṭhin bawk. Nomawi kan hnaih leh ta hle a, Deschamps hian a theihna leh malsawmna nen min hruai a nih hi.

"Nomawi kan hawn leh ngei ang a, Deschamps pawh a cham a ṭul ang. He France team vang hian ka inchhuang hle a ni," tiin a sawi a, French coach hnathawh ropui chu a fak.

Kum 54 mi Deschamps hian kum 2012 aṭang khan France team hi a enkawl ṭan a, Euro 2016-ah final hruai thlengin, World Cup 2018-ah champion nomawi a chawipui a, UEFA Nations League 2020-21-ah an champion a, tunah World Cup final an lut leh ta.

Vittorio Pozzo chuan 1934 leh 1938 khan a zawnin Italy chu world champion a lo nihpui tawh a, Deschamps hian Pathianni zanah a team hi Argentina laka hnehna a chanpui thei a nih chuan Pozzo hnua a zawna World Cup nomawi chawi thei coach hmasa ber a ni ang.

Deschamps hian kum 1998 khan captain ni chungin France chu World Cup champion a lo nihpui tawh bawk a, kuminah an champion leh a nih chuan Brazil (1958 & 1962) hnua World Cup-a a zawna champion leh thei hmasa ber an ni dawn a ni.