Mangṭha le Morocco

Morocco-in football khawvel barakhaihin World Cup semifinal an thleng a, mahse, an zinkawng chu Nilaini zan khan tihtawpsakin an awm ta.

England legend Alan Shearer chuan, "Morocco kha an hnathawh avangin inchhuang tur an ni - zanina France laka an khelh danah mai ni lo, tun tournament pumpui an khelh danah khan an ti ṭha hle a ni.

"An fan-ten nuam ti takin World Cup an hmachhawn a, tlarhmaah kha ai khan tlemin hriam hret se, final an khel ni mai tur," a ti a, Morocco hnathawh chu a chhuan thu a sawi.

Morocco player-ten hnehna chang zo lo mah se Africa khawmualpui aṭanga World Cup semifinal inpetkai hmasa ber an ni thei a, an sulhnu an thlirlet apiangin chhuang takin an thlirlet ṭhin ang.

France-in an phu ang ngeiin final an lut a, chutihrual chuan Morocco lakah awlsamin an chak bik lo - Les Bleus khan 39% chiah ball an chang a, vawi 14 shot neiin target-ah vawi thum a kal.

Ball chang tam zawk Morocco pawhin vawi 13 shot an nei a, chung zinga pathum chu target-ah tho a kal - Morocco fans thlirna aṭang chuan France kha an vannei zawk tiin a sawi theih.

Mahse, inelna ṭan hmaa group stage pawh paltlang lo tura ngaih khan semifinal an inpetkai a, an kalkawngah European ram lian Belgium, Spain leh Portugal an hneh a, pathumna inchuhin Croatia an hmachhawn leh dawn.

Ram pahnih hi group stage-ah khan intawng tawhin, goal khung loin an inhnehtawk a, Inrinni zanah chak zawk an awm tawh dawn - a boruak a la 'hot' reng ang.