Golden Boot dawng tur hriatthiam a la har Messi, Mbappe, Alvarez leh Giroud

FIFA World Cup 2022-ah final leh third place chauh khelh tur a awm tawh a, goal khung tam berin an dawn ṭhin Golden Boot dawng tur a la chiang lo. Argentina captain Lionel Messi leh France innghahna Kylian Mbappe ten goal nga ve ve an khung a; Les Bleus forward Olivier Giroud leh La Albiceleste forward Julián Álvarez ten goal li ve ve an khung bawk.

Goal khung zat hi a inang a nih chuan an ṭhiante goal khung tur an siamsak zat (assist) en leh tur a ni a, an assist neih zat hi a la inang cheu chuan minute khelh zat en leh tur a ni. Messi-a'n Mbappe aia assist a ngah zawk avangin a dinhmun a ṭha zawk a, Alvarez pawh Bronze Boot dawng turin Giroud aia a khelh tlem zawk avangin a dinhmun a ṭha zawk.

Messi tan chawimawina?

Argentina captain Lionel Messi hian football a chawimawina sang dawn theih ang chu a dawng deuh vek tawh a, FIFA World Cup Golden Ball (best player) thlengin a dawng tawh. Tun ṭumah hian Messi hi Golden Ball leh Golden Boot dawng kawp turin a dinhmun a ṭha.

Messi hian World Cup match hmasa berah Saudi Arabia lakah penalty aṭangin a khung a, amaherawhchu Argentina hi Asia ram lakah an vanduai. Paris Saint-Germain forward hian Mexico 2-0 a an hneh ṭumin hmahruaina goal a pet goal a, group match hnuhnung bera Poland an hmachhawn ṭumin goal a khung lo. Last 16-a Australia an hmachhawn ṭumin goal ṭha bik a khung leh bawk. Aussies lakah Messi hian ram leh club tana match 1000-na a khel a, hun pawimawh bikah goal mawi bik a khung.

Argentina-in final an thlen theih nen Messi hian quarterfinal-a Netherlands leh semifinal-a Croatia an hneh ṭumin penalty aṭangin a khung leh ve ve bawk. Messi hian World Cup hrim hrimah goal 11 a khung tawh a, player khel lai zinga goal khung tam ber a ni.

Mbappe hun

Lionel Messi leh Cristiano Ronaldo hun a inher liam ṭan a, Kylian Mbappe hun a inher chhuak dawn tia ngaitu an awm pawhin a awm lo hran lo. PSG forward hian goal nga a khung tawh a, amaherawhchu quarterfinal leh semfinal-ah goal a khung loh avangin Messi dinhmun a ṭha hret.

Mbappe hian World Cup-ah bul a ṭan ṭha a, Australia 4-1 a an hneh ṭumin goal a khung nghal a, Denmark an hneh ṭumin goal hnih a khung leh bawk. Last 16-ah France-in Poland 3-1 in an hneh a, Mbappe hian goal hnih a khung. Chutihrualin Mbappe hian Golden Boot a dawng dawn a nih chuan final-ah goal a khung loh pawhin assist tal neih a ngai ang.

Giroud leh Alvarez

Inelna ṭan hma khan Golden Boot dawng tur inrinsiak se Olivier Giroud leh Julian Alvarez ringtu an tam vakin a rinawm lo. World Cup 2018-a France an champion khan Giroud hian goal a khung lo a, Alvarez pawh hi Argentina tana hmun pawimawh chang tur niin a lang lo bawk.

Mahse, Alvarez hian goal li a khung tawh. Man City forward Alavarez hian Poland lakah World Cup-a a goal hmasa ber a khung a, last 16-a Australia 2-1 a an hneh ṭumin goal hnuhnung zawk a khung. Knockout chinah Alvarez hian bul a ṭan vek a, Croatia lakah goal hnih a khung.

Giroud hi Karim Benzema awm loh vanga hmun pawimawh chang a ni a, France tan a pawimawh hle. AC Milan striker hian Australia lakah goal hnih a khung nghal a, last 16-a Poland an hneh ṭumin goal hmahruai khungin quarterfinal-a England an hneh ṭumin chakna goal a khung leh bawk.