Real Madrid-ah Ronaldo a training

Cristiano Ronaldo chuan World Cup khelh zawh aṭanga rei lote hnuah training a zawm leh nghal ta. Portugal captain hian Nilaini khan Real Madrid training-na hmun Valdebebas-ah inbuatsaihna hun a nei.

Manchester United nena an inṭhen hnuah Ronaldo hian club a la nei leh lo. Portugal tan World Cup a khel a, an ram hi quarterfinal thlen pui mah se Morocco hneh loin an zinkawng a tawp.

Nakkum January 1 aṭang chuan a club duh zawng a zawm thei dawn a, inkhel loa awm reng chuan a taksa in a tuar dawn. Chuvangin team training pui tur nei lo mah se mimal tala inbuatsaihna a kalpui a ngai.

Tuna sawmna a hmuh langsar ber chu Saudi Arabian club Al-Nassr aṭangin a ni, anni hian kum khata euro maktaduai 200 hlawh turin an thlem niin an sawi - Ronaldo hian a la chhanglet lo thung.

Juventus aṭanga Man United a kir leh hnuah Ronaldo hi a tir lamah chuan a che chhe lo, mahse coach thar Erik ten Hag hnuaiah rinrawl a ni lo. World Cup khelh hma deuh khan thu dengkhawng tak tak a sawi a, chumi chuan nghawng na tak a nei.

Manager Ten Hag a zah bik loh thu a sawi a, a khelh mekna Man United a sawisel bawk. Premier League club hian Ronaldo nena an inzawmna an chhu chat a, an ram Portugal lamah rinrawl a nih loh zui bawk avangin hun harsa a tawng mek.

Real Madrid tan match 438 aṭanga goal 450 khung thei Ronaldo hi Spanish club lian hian an la let dawn tihna a ni hran lo, a vanglaia player man tam ber ni tawh, mimal chawimawina sang Ballon d'Or pawh vawi ruk dawng tawh hi thlasik bazar ti ngaihnawm zualtu a ni dawn.