Armando Broja tan season a tawp

Chelsea striker Armando Broja chu a khup hliam vangin hun rei tak a chawlh a ngai dawn a, tun season kal laiah chuan Blues tan a inlan hman dawn tawh lo - London club tan chanchin lawmawm lo a ni ang.

Kum 21 mi Broja hi Aston Villa defender Ezri Konsa nen ball an inchuhna lamah a hliam a, a hliam hi endik a nih hnuah zai a ngai dawn tih an chiang.

Chelsea chuan thuchhuah siamin, "A hliam endik a ni a, vanduai thlak takin zai a ngai dawn. Club damdawi lam thiamte nen uluk taka enkawl a ni dawn a, a dam leh thuai theih nan duhsakna kan hlan," an ti.

Albania international chuan thlawpna a dawn vangin lawmthu a sawi ve bawk. Broja chuan, "Tun hnai ka hun hman dan chu a hrehawm ve hle, mahse tun hma aia ṭha zawkin ka lo kir leh ngai ang," tiin a sawi.

Broja hian tun season Premier League match 12 a khel tawh a, chung zinga 10 chu substitute bench aṭanga a lut niin goal khat a khung tawh. Season hmasa khan intuaihriam turin Southampton tan loan hmangin a lo khel tawh bawk a ni.

Graham Potter-a enkawl Chelsea hi World Cup hma an match hnuhnung pathumah an tlawm, an tan chuan ram leh ram inelna lian a thleng hi thil ṭha tak niah a ngaih theih. December 27 hian Bournemouth an hmachhawn ang.

Blues hi Premier League table-ah pariatna an ni mek a, hmahruaitu Arsenal an phak lohna chu point 16 a ni.