Barcelona Open khel tur Alcaraz

Carlos Alcaraz chuan Barcelona Open nomawi a kawl lai humhim a tum dawn, season tharah Catalan khawpuia inelna lianah hian a inlan leh ngei dawn tih tournament buatsaihtu lamin an sawi.

Kum 19 mi Alcaraz hian kumin khan a vawi khat nan clay court inelnaah hian a champion, amah ang bawka Spanish player Pablo Carrenbo hnehin nomawi a chawi, world number 1 a nih theih nana kawng pawimawh zinga mi a ni bawk.

Barcelona Open buatsaihtu lam chuan thu chhuah siamin, "Alcaraz hi Barcelona Open 2023 khel tura hming pe lut hmasa ber a ni," tiin an sawi a, director David Ferrer chuan Alcarac chu Spanish mipui bakah khawvela tennis fans dangte ngainat a tih thu a sawi bawk a ni.

Ferrer chuan, "World number 1 ni thei naupang ber a ni a, season ṭha taka hmang zo hlim a ni bawk. Ani a rawn inlan a nih chuan midang tan pawh chona a ni dawn a, tournament hlawhtling tak kan buatsaih thei dawn niin a lang," a ti.

Clay court inelna zinga mi Barcelona Open hi nakkum April thlaa khelh tur a ni dawn a, inelna lian French Open inbuatsaih nan an hmang leh nghal bawk ang.