Diaz a la chawl rei dawn

Liverpool forward Luis Diaz a khup hliam chu an zai hlawhtling viau a, training nem deuh nei leh tawh mah se ṭha pangngai taka inkhel leh thei tur chuan a tlem berah thla thum tal a chawlh a la ngai dawn niin Reds manager Jurgen Klopp chuan a sawi.

October thlaah Arsenal an hneh loh ṭumin Diaz hi a inhliam a, tunah Dubai khawpuia Liverpool training-na hmunah hun a hmang ve leh thei ṭan tawh, a ṭhiante tih ang erawh a la ti ve thei lo thung.

Liverpool manager Jurgen Klopp chuan, "Diaz a inhliam kha chu kan zaivai tana thil pawi leh nghawng na tak a ni. Training chu a nei ve ngei mai, mahse tlemte chauh a la ni, engmah lo mai a la ni.

"Ni tin a dinhmun endik zel a ni dawn a, a lo kir hun tak la chiang lo mah se kan nghakhlel hle tih chu kan sawi thei," tiin a sawi a, thlasik bazarah player an lei ngei dawn em tih erawh a la sawi rih lo thung.

Reds hi Premier League table-ah parukna an ni mek. December 22 hian Manchester City nen League Cup fourth round an khel dawn, chumi hnuah Aston Villa nen December 26 hian league match an khel chhunzawm leh nghal dawn a ni.