Curry inhliam niah GSW an chak lo

Nimin zing NBA regular season inkhelah Stephen Curry chu a dar (shoulder) a hliam a, basketball inelna sang bera champion lai Warriors hi an khingpui Indiana Pacers lakah 125-119 in an chak lo zui bawk.

Curry hian point 38 chu a nei hman, an team tana thawh hlawk ber pawh a ni. Mahse, quarter thumna an khelh laiin a hliam a, quarter hnuhnung berah a inlan thei lo, a chawlh chen tur erawh hriat a la ni lo.

Golden State coach Steve Kerr chuan, "Curry hliam hi endik hmasak phawt a ni dawn. A nihna tak sawi chuan Steph tel lo chuan hun hman chhoh a huphurhawm a, a harsa hle mai thei bawk," tiin a sawi.

Warriors hian tun hnai season kua chhunga a vawi nga nan champion an tum. Mahse, match 29 an khelh tawh zingah 15 tehmeuhah an tlawm; Eastern Conference table-ah 10-na an ni chauh a, tunah chuan champion ni loin playoff khelh phak chu an tum hmasak tur a ni ang.

Kerr chuan sawi zawmin, "Ka naute hnenah thlaphang loa awm turin ka hrilh a, season harsa leh ṭha lo tak kan hman mek aṭanga kan thawh chhuah theih dan tur hi ngun takin ka ngaihtuah mek zel, kan theih ngei pawh ka ring," a ti.

Inkhel dangah Denver Nuggets chuan Washington Wizards lakah 141-128 in hnehna an chang. Nuggets tan NBA Most Valuable Player vawi hnih ni tawh Nikola Jokic chuan point 43 lai a nei.

Paul George a che ṭha hle bawk. George hian point 17 a neih bakah rebound vawi 11 a la, assist vawi 11 nei bawkin Los Angeles Clippers chu Minnesota Timberwolves lakah 99-88 in hnehna a lo chanpui ve bawk.