Man United hralh a ṭha ang - Ten Hag

Manchester United manager Erik ten Hag chuan, club neitu Glazer chhungkuain United hralh an tum chu a hriatthiampui a, nakin zel atan pawh thil ṭha leh hmasawnna tur zawk nia a ngaih thu a sawi chhuak.

US sumdawng hausa Glazer chhungkua hian kum 17 chhung zet neitu an nih hnuah, thla hmasa aṭang khan Man United hi hralh an rilruk a, a puma an hralh vek lo a nih pawhin sumdawnna kawnga thawhpui theih tur an melh.

Ten Hag chuan, "Eng pawh ni se, ka thu hriat ve danah chuan club neitu lamin hmasawnna tura tha an thawh nasa dawn a nih chuan hralh a ṭha ang. Club kalphung leh thil tum a danglam lo a, chumi ti hlawhtling tur chuan pawisa a pawimawh," a ti.

Dutch manager chuan Premier League a hautak thu sawi zawmin, "Newcastle United an rawn lian mek, anni bakah hian West Ham United pawh sawi hmaih a thiang lo, harsa lo takin club ṭha pasarih vel hi chu a sawi mai theih.

"Sum chauh ni loin ruahmanna kan neih fel a ngai a, chu chu hma kan sawn theihna tur a ni. Chutih rualin, hlawhtling tur chuan player ṭha, theihna nei sang leh kan duh anga khel thei kan neih a ngai ve bawk," tiin a sawi.

Man United hian tun hnai season nga chhung chu nomawi an chawi miah lo. English champion vawi 20 ni tawh tan chuan tun hnaia an kal dan hi a ṭha tawk lo, club neitu lamin danglamna an zawng ta mai pawh hi a mak hran lo.