Pozzo record nihrual theitu Deschamps?

FIFA World Cup nomawi vawi hnih chawi thei coach awmchhun chu Vittorio Pozzo a ni a, kum 1934 leh 1938 khan an ram Italy chu kum zawnin a champion pui. France coach Didier Deschamps chuan Pozzo record nihrual theihna hun ṭha a nei a, record ropui bik nei tur chuan match khat chuah chak a ngai tawh. Chutihrualin a khelh hmabak match-a an khingpui tur chu Lionel Messi telna Argentina a ni.

Pozzo hi March 2, 1886 khan Turin-ah a piang a, professional footballer a nih hnuah coach hna a chelh leh a, journalist hna a chelh leh bawk. Italian coach hi khawvela coach ropui ber zinga chhiar tel a ni a, a chhan chu World Cup nomawi vawi hnih a chawi inkarah hian Olympic-ah Italy chu gold medal a lakpui bawk.

December 21, 1968 khan kum 82 mi niin a thi a, a hnathawh erawh football khawvelin an hre reng. Kum 2011 khan Italian Football Hall of Fame-ah dahluh a ni a, kum 2013 khan World Soccer Magazine chuan manager awm tawha ropui ber 13-naah a thlang.

Deschamps pawh hian World Cup nomawi hi a chawi nawn thei ta lo a nih pawhin mi bik huangah a awm tawh tho tho. Kum 1998 khan France chu a captain-na hnuaiah a champion pui a, Deschamps hian France team chu kum 2018 khan a champion pui leh bawk.

Player leh coach nichunga champion thei hi midang pahnih an awm a; Brazilian Mario Zagallo chuan player (1958 leh 1962) leh manager (1970) nichungin nomawi hi la chawi tawh. Franz Beckenbauer pawhin 1974 khan a captain-na hnuaiah West Germany a champion pui a, kum 1990 khan a enkawlna hnuaiah West Germany a champion pui leh a ni.