Mumbai kan hneh thei ang - Ivan Gonzalez

East Bengal captain Ivan Gonzalez chuan zanin dar 7:30-a Mumbai City an hmachhawn hunah hnehna an chan theih a beisei thu a sawi a, "Durand Cup-a kan lo hneh tawhna khan inrintawkna min pe dawn a ni," a ti.

ISL table aṭanga thlir chuan team pahnih hi an inthlau hle - Mumbai City hi pahnihna an ni mek a, match kua an khelh tawhah vawi ruk chakin, vawi thum an khingpui an inhnehtawkpui a, tlawm an la nei lo.

Mumbai hian hmahruaitu Hyderabad FC chu point khat chauhin an phak lo a, match khatin an khel tlem zawk bawk. Nizan khan Odisha leh ATK Mohun Bagan an inkhel a, result kan hre hman lo - an result a zirin Mumbai dinhmun hi a danglam leh thei bawk.

Hetihlai hian East Bengal erawh match kua an khelh aṭangin vawi thum chiah an la chak a, vawi ruk an tlawm tawh avangin an record hi a ropui lo hle - Ivan Gonzalez erawh a zam phah lo.

Kum 32 mi defender chuan, "Durand Cup-a kan lo hneh tawh khan inrintawkna min pe dawn. Kolkata khawpuiah rei lotê bak kan la awm lo tih khan kan hneh a ni.

"Vawi khat kan hneh tawh a, kan hneh leh thei ang - hei hi rilrua vawng reng chungin inelna kan hmachhawn dawn a ni," a ti a, hnehna chan ngei a tum ruh hle.

Real Madrid academy aṭanga inzir chhuak Ivan hian FC Goa tan season hnih a lo khelh tawh avangin Indian football-ah a mikhual lo hle a, tun season ṭan dawn khan Goan club aṭangin East Bengal hi a zawm.

Durand Cup-a team pahnih an inhmachhawn ṭum khan Red & Golds hian 4-3 in hnehna an chang a, Cleiton Silva leh Sumeet Passi ten goal hnih ve ve an khung - Mumbai tan Mizo tlangval Lallianzuala Chhangte chuan goal hnih khungin, Scottish forward Greg Stewart chuan goal khat a khung bawk.

Lunglei tlangval Lianzuala hi Durand Cup-ah goal sarih khungin top scorer a ni zui a, ISL-ah pawh a chet ṭhat a chhunzawm - match kua khel tawhin goal li a khung a, assist vawi khat a nei bawk.

Zaninah India tana a match hmasa ber khelhtirtu, India coach hlui Stephen Constantine-a enkawl East Bengal an hmachhawn dawn a, a pu hlui team lakah goal khung a châk ang.

Mumbai City tan hian Lalengmawia Ralte (Apuia) chuan hmun pawimawh a chang ṭhin bawk a, ani pawhin match riat khel tawhin goal khat a khung - East Bengal goal nawr tur chhut chah a tum dawn.

East Bengal-in Mizo player Jerry Lalrinzuala leh Lalchungnunga an kawl bawk a, Jerry hian match riat khel tawhin, Chungnunga'n match kua a khel tawh bawk a, hmun pawimawh an chang ve ve. Zaninah pawh Mumbai City hmachhawn tura beisei an ni.

ISL-ah Mizo defender ṭhaten Mizo forward ṭha dan an tum dawn a, a hmuhnawm loh ring suh.