Argentina Vs France; Tehfung hrang hrang hmanga khaikhinna

FIFA World Cup 2022 final khel tur Argentina leh France player-te hi an kum, an san zawng, ram tana an khelh zat leh an goal khung zat hmangin inkhaikhin teh ang. Football ram ropui pahnih final-a an inhmachhawn tur hi thilmak a ni lo a, Pathianni zana inkhel tur hi 'final duhthusama' ngaitu pawh an ṭhahnem khawp ang.

Tu nge upa zawk?

Argentina player zinga upa ber chu Franco Armani a ni a; October 16, 1986 khan a piang. Kum 36 mi Armani hi tun inelnaah a la inlan lo a, inlan tawh zinga upa ber chu kum 35 mi Lionel Messi niin June 24, 1987-ah a piang.

France squad-a upa ber chu second keeper Steve Mandanda a ni a, kum 37 mi niin March 28, 1987 khan a piang. Mandanda hi group match hnuhnung bera Tunisia an hneh loh ṭum khan a inlan lo a, rinrawl zinga upa ber chu goal li khung tawhtu striker Olivier Giroud a ni.

Giroud hi September 30, 1986 khan a piang a, kum 36 mi ni tawh mah se khelmualah a la ṭangkai hle. France captain Hugo Lloris pawh December 12, 1986-ah piangin Argentina keeper Armani aiin a naupang hret.

Argentina squad hi chawhrualin kum 27 leh thla 10 an ni a, France hi kum 26 leh thla sarih an ni thung. Les Bleus an naupang hret.

Team pahnihah hian kum 20 hnuai lam (teenager) an awm tawh lo ve ve. France midfielder Eduardo Camavinga (10-11-2002) chu a naupang ber a, khelhna hmun a chang pha meuh lo thung. Argentina lamah Thiago Almada (26-04-2001) a naupang ber a, midfielder pawimawh ni pha Enzo Fernández (17-01-2001) aiin thla thum vel lekin a naupang zawk.

France an sang zawk?

France player-te hi feet ruk ṭhiau an ni a, chawhrual pawhin feet ruk leh inch khat an tling pha hial. Argentina-ah erawh feet ruk tling pakua an awm. Chung zingah chuan reserve goalkeeper pahnih Franco Armani leh Geronimo Rulli bakah khelhna hmun chang tam lo Germán Pezzella, Juan Foyth leh Guido Rodriguez te an awm.

Chutihrualin len hi a pawimawh ber a ni lo a, player langsar ber Lionel Messi pawh feet nga leh inches sarih chauh a ni. Argentina-ah hian Messi aia tawi Alejandro Gómez a awm a, Sevilla midfielder hi feet nga leh inches ruk chauha sang a ni.

France-ah erawh player tawi fal ber Antoine Griezmann pawh feet nga leh inches riat a ni pha a, team pahniha sang ber chu France third keeper Alphonse Areola niin feet ruk leh inches ngaa sang a ni.

Tawnhriat ngah

Argentina tana khel tam ber Lionel Messi hian match 171 tehmeuh a khel tawh a, team pahniha ram tana khel tam ber a ni. Les Bleus lamah captain Hugo Lloris-a'n match 144 a khel tawh bawk.

Argentina-ah hian match 100 khel tling chu Messi leh Angel Di Maria chiah an awm a, final-ah Nicolas Otamendi-a'n match 100-na a khel ang. France lamah Lloris bakah Olivier Giroud leh Griezmann ten match 100 an khel tling tawh thung.

Chawhrualin Argentina player tin hi ram tan vawi 37.8 khel tawh ang an ni a, France player-te hi vawi 37.6 khel tawh ang niin team pahnih hi an intluk tawk hle.

Goal khung tam

Argentina leh France ten an ram history-a goal khung tam ber an kawl ve ve a, a goal khung zat erawh a inhthlau deuh. Messi-a'n ram tan goal 96 a khung tawh a, amah hnaih bertu Di Maria-a'n goal 27 khungin Lautaro Martinez-a'n goal 21 a khung bawk. Messi, Di Maria leh Lautaro tih loh chu goal 10 khung tling an awm lo thung.

France tana goal khung tam ber Giroud-a'n goal 53 a khung a, amah hnaih bertu Antoine Griezmann (42) nen an khung zat belh khawm chu goal 95 niin Messi khung zat an pha lo. Les Blues squad-ah hian Giroud, Griezmann bakah Karim Benzema (37) leh Kylian Mbappe (33) ten goal 10 aia tam an khung bawk.

Chutihrualin chawhrualin France player-ten (7.38 goals) Argentina player-te (6.81) aiin an khung tam zawk. Mak ang reng tak erawh goalkeeper pathum tiam loin Argentina lamah ram tana goal la khung miah lo player pasarih an awm a, France lamah goal la khung miah lo pariat an awm bawk.

Argentina an chungnung hret

FIFA World Cup 2022 final-a inhmachhawn tur Argentina leh France te hian World Cup nomawi vawi hnih ve ve an chawi tawh a, an pahnih inkhelh tawhnaah erawh La Albiceleste record a ṭha zawk. Ram pahnih hi vawi 12 an inkhel tawh a, Argentina hi vawi ruk chak tawhin vawi thum an inhnehtawk a, France hi vawi thum an chak tawh thung.

World Cup bikah team pahnih hi vawi thum an inkhel tawh a, Argentina hi vawi hnih chakin France hi vawi khat an chak. Chutihrualin Les Bleus chakna hi an intawn hnuhnun ber a ni a, 2018 World Cup last 16 kha niin Didier Deschamps hote 4-3 in an chak.

Deschamps hian World Cup nomawi a chawi hnuah France team a la enkawl char char a, Argentina erawhin Jorge Sampaoli banin team enkawl turin Lionel Scaloni an lalut. Scaloni hian World Cup a hmachhawn hmain Copa America nomawi a chawi a, South American champion leh European champion inkhelhna Artemio Franchi Cup-ah Italy 3-0 in an hneh bawk.