Ennawm ropui puanzar an khar dawn ta!

World Cup final 2022 chu Pathianni zan dar 8:30 hian Argentina leh champion lai France ten an khel dawn. Lionel Messi awmna leh Kylian Mbappe te ram inkhel tur hi sawi ropui emaw, ziah ropui chawp emaw a ngai lo - 'A Ropui' sa hrim hrim.

Messi-a'n ropuina zawng zawng nei turin World Cup bak mamawh a nei tawh lo, chumi hlen chhuak tur chuan match khatah chak a la ngai. Mbappe telna Les Bleus hi an champion leh a nih chuan, Pele awmna Brazil thil tih ang - a zawna champion leh thei hmasa ber an ni ang.

Eng vangin nge inkhawm bangte hmanhmawh taka an haw? World Cup final en an duh vang a ni, khawvel mipuiin Qatar lam a hawi dawn a, inkhel a zawh meuh chuan lawm leh lungngaih vanga mittui luang a inchawhpawlh nuaih tawh dawn.

Hun ṭha hnuhnung

Lionel Messi hi player ṭha chungchuang bik, mimal chawimawina dawn hnem lamah phei chuan tuma tluk phak loh, nomawi chawi hnem lamah pawh midang chunga leng a ni, amaherawhchu famkim lohna khawvelah hian 'mahse' a nei ve tho.

Argentina tan a hlawhtling tawk lo, an ti ṭhin. Match khelh hnem leh goal khung hnem lamah an chungnung ber a ni thei a, khawmualpui inelna Copa Amercia nomawi a chawipui tawh bawk - duhthusam tikim tur erawh chuan World Cup a la mamawh.

Diego Maradona anga World Cup champion a nih theih ngat chuan, a tan hmabak hlen belhchhan tur a awm tawh chuang lo ang. Messi hian, "Ka tana World Cup match hnuhnung ber tur," tiin a sawi lawk tawh a, football a khelh hun chhunga hun pawimawh ber tia chhal ngam chu a ni dawn.

Semifinal-a Croatia an hneh ṭum khan Messi hian a malpui a dawm a, hliam a nei niin a lang. Mahse, thlak ngai loin a inkhel tluan. Ningani khan training ve tho mah se, midang aiin a training nep deuh niin an sawi, zaninah erawh a tir aṭangin a ri phat tura beisei a ni.

Messi tan

Argentina midfielder Rodrigo De Paul chuan, "Argentina tan kan inkhel, chutihrualin Lionel Messi tan pawh a ni," tiin a sawi a, a thusawi hi player dang leh Argentine mipui tam tak pawm dan pawh a ni ngei ang.

World Cup ṭan hma aṭangin Argentina thawm a lian a, mitdelte hriat khawp a ni. Saudi Arabia laka an tlawm nghal kha an tan chuan intuaihriamna a nih thu Messi-a'n a sawi tawh a, final-a an chak ngei a beisei thu a sawi bawk.

Argentina lamin Messi tan an khel dawn, an khingpui tur France erawhin an ram tan an khel ve thung dawn. Olivier Giroud chuan, "Messi hi player ropui bik a ni, mahse a hringnuna zan hlimawm ber a hman kan remti dawn lo, dan kan tum dawn," a ti.

France defender Theo Hernandez leh midfielder Aurelien Tchouameni te pawhin Messi an ven uluk tur thu an sawi. Les Bleus thluak bur Antoine Griezmann erawhin Messi chauh ni loin, player ṭha dang 10 an hmachhawn tel tur thu a sawi ve bawk.

Deschamps a zam lo

France player pawimawh inhliam hi thui tak ziah tham an ni. Christopher Nkunku, Presnel Kimpembe, Lucas Hernandez, Karim Benzema, Mike Maignan, N’Golo Kanté leh Paul Pogba ten World Cup an khel thei lo vek.

Mahse, player a nih laia world champion ni tawh Didier Deschamps an nei miau a, pa luhlul leh huaisen hi a zam phah lo - an ram hi a zawnin World Cup final a thlenpui thei a, a squad neih sa a ring tlat hi a tifuh hle.

Deschamps chuan, "Pen khat pen leh a la ngai," tiin semifinal-a Morocco an hneh hnuah a sawi a, an khingpui tur Argentina captain Messi chu an intawn tawhnaah a langsar lem lo tih a lo sawi zauh tawh bawk, ven leh theih a inbeisei viau.

World Cup hmasa lama an intawn kha chuan Kante a awm a, ani hian Messi a veng uluk. Tunah erawh Chelsea midfielder a awm tawh dawn lo, ani aia tawnhriat nei tam lo, kum 22 mi Tchouameni chungah mawhphurhna a tla dawn.

Mbappe hlau r'u

World Cup 2018 kha kan la hria a, kha tih laia rawlthar tlan chak zet Mbappe khan Argentina tlarhnung a pal darh a nih kha. An intawn hnuhnunga Argentina player ṭhenkhat kha an la awm, an coach erawh Lionel Scaloni a ni tawh thung.

Scaloni tan Mbappe ven dan tur ngaihtuah hi thil pawimawh bik a ni a, a chet ran bakah a tlan chak êm avangin hmun awl siamsak chi a ni dawn lo, tlarhnung sir lamah tawnhriat nei ṭha an pawimawh dawn.

Mbappe hi kum 23 mi chauh a la ni a, football inelna ngaihhlut hlawh bera vawi hnih champion turin match khat chak chauh a mamawh tawh, tun ṭumah hian a champion leh a nih chuan, legend Pele angin vawi thum a champion lo ang tih tu nge sawi thei!

Giroud lam hmaih a thiang lo, an ram tana goal khung hnem ber hi ball kangah a hlauhawm - boruak lam hi Argentina ṭhat tawk lohna lai a ni. England defender-ten ball an tauh khalh hman loh striker ven hi Nicolas Otamendi leh Cristian Romero te tan hnapui tur a ni ang.