Zaninah pathumna inchuh

Qatar World Cup pathumna inchuh chu zanin dar 8:30 hian Khalifa International Stadium-ah khelh a ni dawn, semifinal-a chak lo pahnih Croatia leh Morocco te an inhmachhawn ang.

African ram zinga World Cup semifinal khel hmasa ber Morocco coach Walid Regragui chuan, "Kan ram hian football level sang tak kan hlat tawh bik lo, pathumna nih ngei tumin kan bei ang," tiin a sawi.

Morocco tan chuan an thlen chin apiang hi mellung thar a ni zel a, zaninah pawh mipui thlawpna an dawng ṭha leh ang. Ram lian dangte tan chuan pathumna inchuh hi a boruak a lian lo a ni mai thei, an tan erawh a danglam.

Regragui naute hi an ṭhat dan takin an khelh theih a rinawm loh. France an hmachhawn dawn khan defender Nayef Aguerd chu bul ṭan tur zingah tel mah se a inhnuhdawh leh a ngai, defender pawimawh Romain Saiss pawh minute 20-na lekah thlak a ngai.

Chawlhlawk laiin Noussair Mazraoui thlak a ngai leh zui a, anni ho hi 100% chuan an dam dawn lo tih a chiang, an squad a chhah bik loh avangin Croatia hneh tur chuan hna a hautak hle ang, chutihrualin hei leh chen hruaitu coach Regragui an nei.

Croatia tan pawh a pawimawh ve tho, an captain chhuanvawr Luka Modric tan World Cup match hnuhnung ber a ni tawh dawn a, an legend hun hnuhnung hi chak loa hman liam ai chuan, hnehna chang chung ngeia hman an duh dawn.

Croatia coach Zlatko Dalic-a'n Euro 2024 thleng a hna chelh chhunzawm a tum thu a sawi chiang tawh a, chuvangin Morocco hneh lo chunga World Cup hman zawh a remchang lo, hmathlir a la neih miau avangin chak a pawimawh.