World Cup Final: Scaloni vs Deschamps

FIFA World Cup 2022 final chu Pathianni zan dar 8:30 hian Lusail Stadium-ah Argentina leh France ten an khel dawn a, team pahnih hi ṭum hnih ve ve an champion tawh bakah inelna ṭan hma aṭanga champion rinkai ni phak ve ve an nih avangin 'Dream Final' tia chhal theih a ni.

Final kalkawngah Argentina tan Lionel Messi a pawimawh a, France lamah Kylian Mbappe a langsar thung. Tun ṭumah erawh final an thlen theihna atana thluak bur leh thutlukna siamtu Lionel Scaloni leh Didier Deschamps te kan thlur bing ang.

Nomawi chawi tura duan

France manager Didier Deschamps hi a inkhelh hun laiin player hmuhnawm tia sawi tur a ni lo a, amaherawhchu team khaikhawmtu ṭha tia sawi tur a ni thung. FIFA World Cup 1998-ah Zinedine Zidane leh Thierry Henry te an langsar a, nomawi chawitu hmasa bertu erawh tun ṭuma France enkawltu Deschamps hi a ni.

Manchester United legend Eric Cantona chuan Deschamps hi 'water-carrier' tiin a sawi a, 'tui petu' tia sawi chu lang mawi lo viau thei ang. Mahse, Cantona hian Deschamps hming a phuahchhan hi a khelh dan vang zawk a ni. Deschamps hian a khingpuite ball a chhuhsak thiam a, ball chang rei loin amah aia ball thiam zawk rang takin a pe ṭhin bawk.

Deschamps hian hna pawimawh lai a thawh ṭhin avangin nomawi pawh a chawi thei hle. Marseille leh Juventus tana a khelh laiin league title bakah Champions League nomawi a chawi a, Chelsea tana a khelh laiin FA Cup nomawi a chawi. A ropuina tak erawh World Cup 1998 leh Euro 2000 nomawi a chawi a, French player of the century an thlanaah pawh pakuanaah awmin Eric Cantona chungah a awm.

Khelmuala team hruaitu ṭha Deschamps hian football khelh a chawlhsan hnuah pawh manager hna a chelh nghal. Monaco chu Champions League final hial a thlenpui a, Juventus pawh Serie B-ah champion puiin Serie A kaipui a, Marseille pawh league nomawi a chawipui.

Euro 2012-ah France an che ṭha lo a, Deschamps hian Laurent Blanc thlakin team chhung buaina pawh a chingfel a, result pawh an nei ṭha. Euro 2016 khan Portugal lakah final-ah an vanduai a, World Cup 2018-ah an phu ang ngeiin Russia ramah an champion a, nikum khan Nations League-ah nomawi an chawi bawk. France hian player ṭha an kawl a, chung player ṭhate an theihna anga khelhtirtu Deschamps hian fak a phu hle.

Team dintu Scaloni

Lionel Scaloni hi a inkhelh hun laiin right back a ni a, Argentina tan vawi sarih inlan theih a nih avangin player vantlang chunglam tiin a sawi theih. World Cup 2006-ah khan Argentina squad-ah Scaloni hi a awm a, Lionel Messi te nen team khatah an awm tihna a ni.

Kum 2000 chhoa Deportivo ṭhat vanglai khan Scaloni hi Spanish club tan hian a khelh a, hei hi Mizo mipui football ngaina chin hriatna tur a ni thei ang. Amaherawhchu player danglam bik a nih miau loh avangin han fak chiamna tur a awm lo.

Kum 44 mi Scaloni hian kum 2015 khan inkhelh a chawlhsan a, Jorge Sampaoli hnuaiah Sevilla coaching staff zingah a tel. Argentina-in Sampaoli an lakluh khan assistant coach hna a chelh zui a, World Cup 2018-a an cheh ṭhat loh hnu khan Sampaoli hmunruak luah khatin Pablo Aimar nen Argentina an enkawl. November 2018 khan Scaloni hi Argentina coach ni tura lak ngheh a ni a; World Cup vawi hnih champion tawh meuhin tawnhriat nei ṭha lo coach a ngheta an dah chhan hi Argentine coach tawnhriat nei ṭha ho an club enkawl laia an ngheh hlawm vang a ni.

Argentina-in rilru hmin zan loin Scaloni la nghet mah se tunah erawh a hnathawh ropui avangin a chhuah a hlau tawh zawk ang. Scaloni hnuaia Argentina-in inelna a hmachhawn hmasa ber chu 2019 Copa America kha a ni a, pathumna an ni. Kum hnih hnuah erawh Argentina tan hun duhawm a her chhuak ta a, Copa America final-ah Brazil hnehin an champion. Kumin June 1 khan South American champion leh European champion inkhelhna CONMEBOL–UEFA Cup of Champions-ah Italy 3-0 in an champion.

Scaloni hian kum li chhungin team ṭha tak a din a, inelna ṭan hma hauhin champion rinkai an ni. Deschamps erawhin France team hi kum 10 chhung a enkawl tawh a, an vanglai a pel tawh angin sawi mah se kum li liam ta ang mai khan an la nghet ṭha hle.

Golden Boot dawng tur?

Pathianni zanah FIFA World Cup 2022 Golden Boot dawng tur chu a chiang dawn ta. Tun dinhmunah Lionel Messi leh Kylian Mbappe ten goal nga ve ve an khung a, Argentina captain hian assist a ngah zawk avangin a dinhmun a ṭha zawk. Final khelh zawhah player pahnih hi an assist neih zat a inang a nih chuan an khelh zat minute en leh tur a ni.

Chutihrualin golden boot inchuhna hi Messi leh Mbappe te inkar chauh a ni lo a, Julian Alvarez leh Olivier Giroud te an tel bawk.