Engtin nge team an rem dawn?

World Cup final hi Lionel Messi leh Kylian Mbappe te inbeihna tiin sawi nasa mah se a nihna takah chuan Lionel Scaloni leh Didier Deschamps te inbeihna a ni. Final an khelh chhoh dan thlirin kum 54 mi Deschamps-a'n a naute a khelhtir dan aiin kum 44 mi Scaloni-a'n a naute a khelhtir dan hi rinlawk thiam a har zawk.

France chu

France hian tun inelnaah vawi ruk khel tawhin vawi nga an chak a, ṭum nga an chaknaah hian 4-2-3-1 formation an hmang. An chak loh awm chhun hi group match-a Tunisia an hmachhawn ṭum a ni a, knockout stage an luh tawh avangin player an thlak hlawk a, 4-3-3 formation nen bul an ṭan.

Les Bleus hian final-ah pawh 4-2-3-1 an hman ngei a rinawm a, player lut tur pawh a tam zawk a hriat theih. Captain Hugo Lloris-a'n semifinal hma zawngin clean sheet nei lo mah se Morocco lakah 'Golden Glove' dawng tlak a ni tih a pholang a, goal a chhuah lo.

Defence laiah tawnhriat nei ṭha Raphael Varane a awm a, Manchester United hi a tlan chak bakah boruakah a ṭha. Varane kawppui tur hi a chiang ta lo - Morocco nen damloh vangin Dayot Upamecano a inlan theih loh avangin Ibrahima Konate a rawn lut.

Liverpool defender Konate hi a khel ṭha thlawt a, final-ah pawh a luh mai a rinawm ta zawk. Mual sira ding tur chuan Jules Kounde leh Theo Hernandez te an awm a, match hmasa berah bul ṭan pha lo ve ve mah se tunah erawh rinrawl an ni tawh.

Midfield-ah Aurélien Tchouaméni chu khawih chet thiang lo ang hialin a sawi theih. Adrien Rabiot pawh Morocco nen damloh vangin khel lo mah se a dam ṭha a nih chuan Real Madrid midfielder Tchouameni nen an inkawp ang. Rabiot a inlan thei ta lo a nih chuan Tchouameni-a'n Monaco-a a kawpui ṭhin Youssouf Fofana bawk a kawppui leh thei ang.

Antoine Griezmann-a'n midfield-ah hmun pawimawh a chang a, Atletico Madrid forward hian Deschamps tan chuan eng position-a khelh pawh a huam. Griezmann hian goal a la khung lo a, assists erawh vawi thum a nei tawh. France number 7 hian forward leh defence a thlun zawm ṭha a, game siamtu ber a ni.

Tlarhmaah Olivier Giroud a ṭangkai ṭhin a, chutihrualin Morocco laka a chance ṭha hlah ang erawh final-ah a chin chhunzawm chi lo ang. Giroud hi mual sirah Mbappe leh Ousmane Dembélé ten an thlawp dawn. Dembele pawh hian Griezmann angin goal a la khung lo mah se assist vawi hnih a nei tawh a ni a, Mbappe hming a lansarh deuh vangin Dembele ngaihthah a thiang lo.

Chutihrualin Mbappe hi mipui mit fukna tur a ni a, Kyle Walker leh Achraf Hakimi te paltlang tawhtu hian Gonzalo Montiel a hmachhawn leh dawn. Sevilla defender Montiel hian Mbappe dah ṭha turin thlawptu a mamawh ngei a rinawm.

Argentina ve thung

Argentina erawhin Scaloni hnuaiah khelh dan nghet bik an nei lo a, an khingpui mil zelin kheh dan an thlak. La Albiceleste coach Scaloni hian Australia 2-1 a an hneh ṭumin 4-3-3 a hmang a, Netherlands an hneh ṭumin defender lai pathum hmangin 3-5-2 a hmang thung a, Croatia lakah 4-4-2 a hmang thung. Final-a an inrem dan tur hriatthiam a har ta hle.

Gareth Southgate khan Mbappe hmachhawn dawn mah se 4-4-2 a ring tlang a, Man City defender Walker lakah mawhphurhna a dah ngam. Morocco coach Walid Regragui erawhin defender pali hmangin loin defender panga a dah a, Mbappe vengtu Achraf Hakimi thlawp turin defender lai pathum a dahah ngaih theih. Argentina coach Scaloni pawh hian defender lai pathum hi Oranje lakah a lo hmang tawh a, rinrawl Nicolás Otamendi leh Cristian Romero te bakah Man United tana season hmang ṭha Lisandro Martínez an kawl avangin 5-3-2 (3-5-2) pawh hmang ta se thilmak a ni lo ang.

Chutihrualin Scaloni hian tun inelna match tam zawka a naute a khelhtir angin defender pali an hman leh mai a rinawm. Goalkeeper Emiliano Martínez chu khawih chet thiang lo a ni a, penalty shootout an thleng a nih phei chuan Aston Villa keeper hi Tottenham keeper Lloris aiin a thlanawm zawk. Defence laiah kum 34 Nicolás Otamendi a la tar lo a, Man City defender hlui hi a ṭangkai ṭhin hle. Otamendi kawppui tur chu Cristian Romero a ni dawn a, Scaloni-a'n Spurs defender Romero a rinchhan chu Croatia lakah khan a chiang. Kum 24 mi Romero hian tharum a ngah a, a lian ṭha a, hma sawn zel thei tur niin a lang bawk.

Mual vei lamah Marcos Acuna a rawn kir thei dawn a, Sevilla wing back hi Argentina attack-na pakhat a ni. Chutihrualin hrem vanga a khelh theih loh ṭumah a aiawhtu Nicolás Tagliafico a khel ṭha takzet a, Acuna hi a awl thei bawk. Mual dinglamah Atletico right back Nahuel Molina chu a chiang a, second half-ah tha thar an mamawh a nih chuan Sevilla defender Gonzalo Montiel a rawn lut thei ang.

Midfield-ah Rodrigo De Paul chu player langsar ber a ni a, Atletico midfielder hian goal leh assist la nei lo mah se mual laiah a ṭangkai ṭhin. De Paul hi Argentina player zinga pass ngah ber (476) a ni a, tlan tam ber (61.03 km) a ni a, chak taka tlan (sprint - 334) ngah ber a ni a, khingpuite attack dang chat ngun ber (100) leh ṭhiante pass theih tura ball pawt ṭha ber a ni bawk.

De Paul kawppui tur hian Enzo Fernández leh Alexis Mac Allister te an awm a, Benfica leh Brighton midfielder te hi an chet ṭhat vanga hmun pawimawh chang chho an nih avangin an hming aṭanga teh chi an ni lo. Kum 21 mi Enzo hian theihna sang tak a nei a, Europe club lian zawk chil tiputtu a ni dawn.

Heng player pathum bakah Leandro Paredes a la awm. PSG midfielder Paredes hi Copa America an champion ṭuma player pawimawh a ni a, tun inelnaah erawh team ti chaktu a ni thung - a hlutna a tlahniam hret.

Amaherawhchu final-ah hian Argentina hian an tiatpui France an pawimawh dawn a, Paredes hlutna a sang thei ang. Chutihrualin Scaloni hian nawr hret a duh a nih chuan Ángel Di María an kawl a, a tawnhriat hi final-ah pawimawh thei. Juventus forward hi group stage-ah bul ṭan vek mah se khelh ṭhat tawk loh vangin knockout stage chinah minute riat chiah a khel!

Tlarhmaah chuan football mawina ti mawizualtu Lionel Messi a awm a, anni hi a ball ṭha petu a nih theih bakah a tawp zo theitu a ni. Messi tan World Cup hnuhnung ber a nih avangin amah vang ringawt pawh hian football ngainatu chuan World Cup final en hi a bat a ni. Argentina hian Messi thlawp tur hian Lautaro Martínez nei mah se knockout stage chinah chuan Julián Álvarez an ring ta zawk.

Alvarez hian tun inelnaah khelh tluan a la nei lo a, mahse goal li ngawt a khung tawh. Semifinal-a Croatia an hneh ṭumin Man City forward hian penalty a hlawh chhuak a, goal hnih a khung zui bawk. Scaloni pawhin a zawna vawi li bul a ṭantir tawh Alvarez hi bench-a dah thut a rinawm lo.