Kan chak ang a, mipui an lo kal ang - Aizawl FC coach

Mizo club Aizawl FC chuan vawiin chawhnu dar 2:30 hian I League match khel turin Mumbai Kenkre FC an mikhual dawn a, Aizawl FC coach Caetano Pinho chuan hnehna an chan ngei a beisei thu a sawi.

Pinho chuan, "Mipui tam zawkin kan inkhel rawn en se kan duh a, Mizo mipuiten kan inkhel min ngaihhlutsak kan duh takzet. Chutihrual chuan hnehna chan a pawimawh a, kan chak zel chuan mipui chu an lokal mai ang," tiin Vanglaini a hrilh.

Aizawl FC hian an match hnuhnung berah Sreenidi Deccan chu 3-3 in an inhnehtawkpui a, coach thar Pinho hnuaia an match hmasa ber a ni - vawiinah erawh mahni mualah an inkhel dawn a, Mizo club tan chak a pawimawh.

Vawiinah I League match inkhel dang a awm dawn lo a, Mizo club-te inkhel hi television-ah chuan Eurosport leh DD Sport-ah a en theih ang a, Discovery+ ah online-in a en theih bawk ang.

Beiseina

Aizawl FC-in season bul an ṭan ṭha tawk lo a, an league match hmasa pangaah vawi khat chiah an chak - hetihlai hian coach Stanley Rozario chu damlohna avangin an thlah a ṭul a, assistant coach Victor Lalbiakmawia leh Lalrozama Fanai ten an enkawl a ṭul.

Mizo coach pahnih kaihhruaina hnuaia an match hmasa berah Roundglass Punjab (2-1) an ngam lo a, khualmualah Churchill Borther (1-1) an inhnehtawkpui bawk. Mahse, RG Stadium-a an inlan meuh chuan 2-1 in Neroca an hneh a, beiseina thar an nei.

Aizawl FC-in Manipur club an hneh hnu lawkah coach thar Caetano Pinho an lakluh thu an puang a, I League club ONGC pawh lo enkawl tawhtu coach hnuaia an match hmasa berah goal thum khung mah se goal thum tho an chhuah ve avangin Sreenidi Deccan lakah point khat bak an hlawh chhuak lo.

Vawiinah RG Stadium-ah an inlan dawn a, fan-ten point thum an beisei dawn. Pinho chuan, "Kenkre hi team ṭha tak an ni a, point thum hmuh a harsa dawn tih kan hria a, mahse, kan tum dawn a ni," tiin Vanglaini a hrilh.

Kenkre thlirna

Mumbai Kenkre FC-in tun season-ah vawi khat chiah hnehna an la chang a, an hneh awmchhun hi Sudeva Delhi FC an ni - match sarih aṭanga point sarih neiin, table-ah 11-na an ni a, Mizo club tan chak tum ngamna tur team an ni.

Pinho chuan, "December 8-ah Neroca kan hneh a, December 11-ah Sreenidi kan hmachhawn lehnghal a ngai. A nihna takah chuan kan hahchawl hman lo a, player-te pawhin hahdamna hun an nei lo.

"Tunah erawh kan hahdam leh tawh a, player-te pawhin inbuatsaihna hun ṭha an nei thei. Chuvangin result ṭha zawk a beisei ngam a ni," a ti a, Aizawl khawpuia Mizo club a enkawl hmasak berah chak a tum hle.

Aizawl FC forward R. Ramdinthara (Tharpuia) chuan, "I League-ah player kan intluktlang viau a, han hlauh tur bik an awm lo," a ti a, Kenkre laka chak turin an ṭha tawkah a ngai.

Buaina a awm lo

Aizawl FC tan goalkeeper Vikram Lahkbir Singh a inlan thei dawn lo a, Sreenidi Deccan lakah red card a hmu - player inhliam an nei lo a, Pinho chuan pakhat kim lo vanga an buai loh tur thu a sawi.

Chutihrual chuan AFC tana Vikram Singh ṭangkaizia hretu tan chuan hlauhthawn loh a harsa a, mahse, coach ber a hlauthawng lo. Pinho chuan, "Red card hmu lo se, inkhel thei se duhthusam chu a ni alawm.

"Mahse, player inhliam an awm lo a, Vikram tih loh chu an inlan vek thei dawn. Red card pakhat hi kan tan buaina a tling lo," a ti a, a squad a chhah tawk thu a sawi - Mizo keeper Vanlalhriatpuia'n si ban a nghah a rinawm.

Mizo club tan tlarhnungah Lalchhawnkima leh Akito Saito chu player langsar an ni lehin a rinawm a, tlarhmaah Henry Kisekka chet ṭhat leh ṭhat lohin Mizo club dinhmun tur thui takin a hril ang - Kenkre-ah hian Mizo player Lalhmangaihsanga a awm.