Agent fee-ah sum sen a tam

Football khawvela thuneitu sang ber FIFA chuan agent fee-a club-te sum sen zat an tarlang a, kum 2022 khan mipa football-ah agent-te hlawh atan club-in pound maktaduai 512 zet an sen thu an sawi.

Kum 2021-ah agent-te hlawh atana club sum sen zat aṭanga tehin 24.3% in agent hlawh hi a pung a, mahse, agent hlawh atana club-te insen tam ber ṭum, kum 2019-a sum sen zat £538.2mtd erawh a phak lo.

Kum 2022 chhunga agent-te hlawh atana sum seng hnem ber ram chu England an ni a, English club-ten agent hlawh atan £167mtd an seng a, pahnihna Italy chuan £72.8mtd an seng thung.

Hetihlai hian hmeichhe football bika agent hlawh erawh a la tlem hle a, kum 2022 khan hmeichhe footballer agent fee atana club ho insen zat chu £699,000 a ni - pound maktaduai khat pawh a tling lo, tihna a ni a, chutihrual chuan kum 2021 nena khaikhin chuan a pung hle.

Kum 2021 khan hmeichhe football-a agent-te hlawh atana sen zat chu £371,000 a ni a, kum liam taa sen zat nena khaikhin chuan a let deuhthawin hmeichhe football-a agent hlawh atana sen zat hi a pung ve tho a ni.

Hmeichhe football transfer-a thil thleng 22.3% ah agent an inrawlh a, mipa transfert bikah erawh 15.3% chiah an inrawlh thung.