Portugal coach Santos a bang

World Cup quarterfinal aṭanga an tlak hnuah Portugal coach Fernando Santos chuan a hna a bansan thu a puang ve leh ta a, Portuguese Football Association (FPF) chuan an coach chhuak ta hi duhsakna an hlan thu an puang.

Kum 68 mi coach hian September 2014 aṭang khan Portugal hi a enkawl ṭan a, Euro 2016 leh UEFA Nations League 2019-ah champion nomawi a chawipui chungin fak a hlawh tawk lo.

World Cup 2022-ah pawh Santos hian Cristiano Ronaldo a khelh tam tir loh avangin sawiselna a tawk nasa a, Portugal tana a hnathawh thlirin hetianga sawisel a tawk hi thilmak a tling.

Santos hian World Cup group stage match awmze nei tawh loah Ronaldo chu bul ṭantir mah se a hnuah a la chhuak a, Manchester United nena inṭhen ta Ronaldo hian a lungawi lohna nasa takin a lantir.

Switzerland nen last 16 an inhmachhawnna inkhelah Santos hian huaisen taka thutlukna siam zuiin, Ronaldo chu bench-ah a dah a, an ram legend aia a luhtir Goncalo Ramos chuan hattrick a siam zui.

World Cup quarterfinal-ah pawh Ronaldo hi bench-a dah a ni a, mahse, Morocco lakah 1-0 in Portugal an vanduai a, Santos-a hma hun a chiang lo zui - tunah chuan a bang ta.

Portuguese Football Association (FPF) chuan, "FPF chuan Fernando Santos leh a team te chu kum riat zet hna ropui tak an thawh avangin lawmthu a hrilh a, he lawmthu sawina hi Portuguese mipui aiawh pawhin kan hlan a ni.

"FPF Board chuan Portugal national team enkawl tur zawn hna a thawk nghal ang," an ti a, AS Roma boss Jose Mourinho hming a ri ring hle.

Kum 68 mi Fernando Santos hian Portugal a enkawl hmain an ram club langsar tak tak FC Porto, Sporting Lisbon leh Benfica a enkawl hman a, Greece lamah Greek club langsar AEK Athens, Panathinaikos leh PAOK enkawlin hming a chher viau bawk.

Portugal a enkawl hma hian international football-ah pawh hming a chher hman viau. Greece chu kum 2010 khan enkawl ṭanin, Euro 2012 a tlinpui a, quarterfinal a hruai thleng hial.

World Cup 2014-ah khan Greece chu a lo kaihruai tawh bawk a, an ram chanchina a vawi khat nan knockout round luhpui mah se last 16-ah penalty hmangin Costa Rica an hneh lo a, an tla.

Greece a chhuahsan hnuah Portugal a enkawl leh a, a thawnthu hrilh nawn kan ngai lo - tun World Cup-ah sawisel tawk mah se, Portuguese football-ah a hming a dai tawh ngai lo ang.