AIFF Grassroots Committee Chairman leh MFA inkawm

All India Football Federation Grassroots Committee chairman Mulrajsinh Chudasam leh Mizoram Football Association Grassroots Committee member-te chu nimin khan MFA Committee Room-ah an inkawm.

Gujarat Football Association honorary secretary ni bawk Mulrajsinh chuan, "AIFF chuan Mizoram hi grassroots football leh football hrim hrimah a dah sâng a, a hnathawhte a hmù a, State dangte entawntlakin hna in thawk a ni," a ti a, AIFF-in Grassroots lama hma a sawn theihna tur hrang hrang an sawiho.

Mulrajsinh Chudasama hi AIFF Development Committee-ah Deputy Chairman a ni bawk a, AIFF-in State FA tana hmasawnna tur ruahmanna a neih hrang hrangte a sawi a, AIFF hruaitu tharin hma an lâk tawhnate a sawi fiah bawk.

AIFF Baby League a tam thei anga kalpui turin Mizoram a sawm a, "District kil berah pawh AIFF Baby League hi kalpui theih a ni a, MFA kaltlangin awlsam taka inziah luh theih a ni. Football hmasawnna kan kalpui hi a vaiin inzawm vek thei se, mahni awmna hmunah a hrang ṭheuha thil kalpui hian hmasawnna a thlen lo a, kan thawh ho tlan a ngai a ni," tiin a sawi.

FIFA Football for Schools hnuaiah India ramah Grassroots football hmasawnna tur duan a nih thu leh, sorkar laipui nen ṭangkawpa state tina kalpui an tum dante a sawi.

MFA honorary secretary Lalnghinglova Hmar chuan inlawmna thu sawiin MFA hnathawhte a sawifiah a; MFA Grassroots Committee chairman PC Vanlalhruaia leh member S Malsawmtluanga-ten thilpek an hlan.

AIFF Grassroots Committee member leh MFA Grassroots Committee-a vice chairman ni bawk Hmingthansanga'n MFA bakah MSSC leh Mizoram sorkar hnuaia Grassroots football kalpui dan hrang hrangte a sawi a; member-te nen Grassroots football hmasawnna tur kawng hrang hrang inpawh takin an sawiho a ni.