WORLD CUP 2022 CHAMPION ARGENTINA ; Player ropui ber chu Lionel Messi

World Cup final inkhel hmuhnawm, ropui leh class sang bikah Argentina chuan France an hneh a, a vawi thum nan world champion an ni.

Lionel Messi-awmna La Albiceleste leh France te hun pangngaiah 2-2 in an inhnehtawk a, extra time-ah goal khat ve ve khung belhin 3-3 in minute 120 chhung inkhel a tawp. Penalty shootout hmanga chak zawk zawnnaah South American ram hi 4-2 in an chak a, Netherlands laka team chakpuitu goalkeeper Emiliano Martínez bawk a che ropui.

Messi tan tehna leh hlenchhuah tur hrang hrang an sawiin an siamsak ṭhin, a tih theih loh tur anga ngaih pawh a hlen chhuah a ngai tiin an sawi ṭhin a, tunah chuan football huanga hlawhtlinna awm thei ang zawng zawng a nei ta - a chungah tumah reng an awm lo.

Pathianni zan Qatar World Cup final hian football hmuhnawmna leh ropuina zawng zawng min chhawp chhuahsak tiin a sawi theih, chu inkhela champion Argentina leh Lionel Messi te chanchin hi khawvela football pet a nih chhung chuan an sawi zui tawh ang.

France tan Kylian Mbaape-a'n hattrick siamin player hlauhawm chungchuang bik a nihna a lantir, mahse heng a goal pathumte hi Messi-a goal hnih leh Angel di Maria goal sutna vek a ni a, ropui viau mah se uiawm taka a liam a ngai.

Goal hnih phawt
Mipui 88,966 lenna Lusail Stadium chhunga entu tam zawkin Argentina jersey an ha a, inkhelh ṭan hma aṭangin 'Lionel Messi' hming an lam ri dual dual a, a boruak chu France player tawnhriat ngah lo tan chuan zamna tham a ni hial ang.

Rodrigo De Paul leh Adrien Rabiot te an han inbitum deuh nghal chat a, in tih nat mai pawh an hreh lo tih a lang - minute khatna lek aṭangin inkhel boruak a nung nghal, khelmual pawn leh chhung a 'hot' nghal viau.

Lionel Scaloni-a'n thutlukna a siam fuh, tawnhriat ngah Angel di Maria chu bul a ṭantir a, mual sir lam aṭangin France tlarhnung an nawr pawp zauh zauh. Di Maria hian Ousmane Dembele a bum hnuah box chhungah ball a lalut.

Dembele a fi mkhur tawk lo, amah tlan peltu hi ti tluin penalty a chawi - inhnialna awm thei ni mah se khelmuala thu ber referee-in penalty a pe tlat.

Argentina tan captain Messi rawn ding chhuakin keeper Hugo Lloris a bum chiang viau. An goal hnihna luh nan Messi hi a che 'tawih' zui hle.

Amah vengtu karah ball a ti pial zeuh a, midfi elder Alexis Mac Allister chuan la lutin ven loha awm Di Maria tan a pe - Juventus forward tan goal hnihna khung turin harsatna a awm lo, goal nawr ngam zawk Argentina lamin chawlhlawk laiin 2-0 in hma an hruai.

Mbappe hun
Didier Deschamps-a'n chawlhlawk hmain player pahnih ngawt a thlak a ngai, striker Olivier Giroud leh Dembele te a la chhuak, second half tir lam thlengin thil a danglam tam lo thung, danglamna siam turin Kingsley Coman dah luh a ni a, inkhel a nung sawt.

Nicolas Otamendi-a'n Randal Kolo Muani a tih tluk avangin penalty a chawi a, goal khung loh hlauhawm tawh hunah Mbappe chuan ball lain mawhphurhna a la ngam a, penalty dang thei tak Emiliano Martínez dan theih lohin a khung.

Argentina thin phu a reh hman lo, an boruak chiai lai takin Messi-a'n ball a hloh a, a kal zelah midfi elder Rabiot leh Mbappe ten ball an inpe a, Marcos  uram ball kang pek chu laklawh nei miah loin Mbappe-a'n a hlap lut a, si phurh a sut zo.

Hun tawp dawnah Messi-a'n hun ṭha a insiam a, box pawn aṭanga a shot hlauhawm zet chu France keeper Lloris chuan a lo dansak hram, 2-2 in hun a tawp. Champion hre turin extra time khelh chhunzawm a ngai.

A hmuhnawm
Player an chau tih a lang a, a bikin Argentina player lam tha a zuai tih a lang. France lamin goal chhuah leh palh an hlau ve tawh tho a, hun pangngai tawp dawn lama an nawr pup pup angin an nawr thei bik lo.

Rabiot lak chhuah a nih hnuah an ball inpe kual a rang lo hret. Argentina lamin bench aṭangin Leandro Paredes leh Lautaro Martinez an dah lut a, Inter Milan striker Martinez hian hun ṭha vawi hnih hmu nghal mai mah se a khung thei bik tlat lo.

Boruak san vanglaiin Martinez-a shot chu Lloris-a'n lo dang per mah se, a per lo dawng fuhtu Messi-a'n a khung, champion-na goal khungah a inngai a, player bakah fans thlengin lawmna mittui a luang hman hial.

Mahse, inkhel a la zo lo, France lamin a changtupa an nei ve tho. Mbappe-a shot chuan Gonzalo Montiel-a ban a fuh, penalty a chawi. Mbappe-a'n hattrick siam nana hmangin an ram beiseina a ti nung leh a, penalty shootout a hruai thleng.

Penalty chu
Boruak a sang tawh si, player nazawng tan penalty pet ngamna chi pawh a ni tawh lo. France tan Mbappe a rawn ding chuak a, ani hian a khung. Mahse, a ball pet hi keeper Martinez-a'n a zuan fuh a, a nat em avangin a lut tho, a dawta pet tur tan erawh a huphurhawm sawt ang.

Messi rawn ding chhuakin cool zetin a khung a, bench aṭanga lut boruak siam tak Coman pet chu Martinez-a'n a lo dansak. Aston Villa keeper hmaa rawn ding chhuak zui Aurélien Tchouaméni a zam tih a lang a, goal zawnah a pet lo.

Argentina tana pettu Paulo Dybala, Peredes leh Gonzalo Montiel ten an pet lut vek a, inkhel pangngai laia chak phu leh khel ṭha zawk Argentina lamin hnehna an chang a, a pet goal-tu tluk zetin keeper Martinez a pawimawh.

Keeper Martinez hian Copa America an champion theih nan tha a lo thawh tawh a, tun World Cup-ah pawh an champion theihna chhan langsar tak a ni, inkhelh tam duh vanga Arsenal chhuahsan tu hi tunah chuan Argentina goal keeper ropui an sawi apiangin a tel zel tawh ang.