Goal khung tam ber Kylian Mbappe

Kum 23 mi Kylian Mbappe chuan a vawi hnih nan World Cup nomawi chawi thei ta lo mah se final-ah Argentina lakah hattrick siamin Golden Boot a dawng.

France forward hian tun inelnaah goal riat a khung a, Lionel Messi aiin goal khatin a khung tam zawk. Mbappe hma hun enzia hi thua sawifiah chi a ni lo a, zaia fiah chi pawh a ni chuang lo. PSG forward hian goal riat bakah assist vawi hnih a nei a, kum 23 mi lek hnathawh atan chuan a ropui hle.

Lionel Messi leh Cristiano Ronaldo ten boot an khai hunah ani ngei hi lal thar ni tura hriaka thih chu niin a lang.

France-in tun World Cup-a an match hmasa berah 4-1 ngawtin Australia an sawp nghal a, goal a khung bakah assist vawi khat a nei tel a, Mbappe nihna tak tak hmuh turin a awm.

World Cup match hnihnaah France-in 2-1 a Denmark hnehin, last 16 an lut nghal a, an goal hnih hi Mbappe khung ve ve a ni. Group stage-a an match hnuhnung berah erawh Didier Deschamps-a'n player ṭhate a awltir a, Tunisia lakah 1-0 in an tlawm a, bench aṭanga lut Mbappe-a'n danglamna a thlen lo.

Mahse, footballer ṭha an bo reng thei lo - round of 16-ah 3-1 in Poland an hneh a, Mbappe-a'n goal hnih a khung bakah assist vawi khat a nei a, quarterfinal (England) leh semifi nal (Morocco) lakah goal a khung lo thung - a hnawksakzia erawh kan hmu.

World Cup fi nal-ah Mbappe chu first half-ah dah ṭhat a ni a, second half-ah pawh hun rei tak bo mah se penalty hmangin minute 80-naah siphurh a sut ṭhen a, minute khat hnuah mawi zeta volley lutin siphurh a sut zo.

Argentina-in Messi hmangin hma an hruai nawn a, Golden Boot dawng thei tur chu Mbappe ni loin Messi a ni leh ta zawk.

A tawpah Mbappe a rawn lang a, minute 118-naah penalty khungin siphurh a sut zo a, Golden Boot dawn theihna goal a ni bawk. France star Mbappe hian penalty shootout-ah pawh khung leh mah se a vanduai zawkah an ṭang ta thung. Mbappe hian World Cup nomawi a chawi loh avangin a lawm a kim lo a, hun tawpah France president Emmanuel Macron-a hnem a ngai hial. 

Mahse, Mbappe zawng a ṭha tih chiang - England striker Geoff Hurst (1966) hnua World Cup final-a hattrick siam thei hmasa ber a ni.

MIMAL LAWMMAN
Golden Ball - Lionel Messi, Argentina
Golden Boot - Kylian Mbappe (8 Goals), France
Golden Glove - Emi Martinez, Argentina
Young Player - Enzo Fernandez (21 Years), Argentina