Modric hoa pathumna Croatia

Croatia chuan pathumna ni chungin Qatar World Cup an mangṭha. Inrinni zana pathumna inchuh inkhelah Croatia hian Morocco chu 2-1 in an hneh, an duhthusama ṭhain inelna hmang zo lo mah se, player ṭha Luka Modric awmna team-in an thlen chin hi a ṭha tawk viau.

Khalifa International Stadium-a inkhelah goal mawi kan hmu, minute sarihna lekah Croatia lamin Josko Gvardiol hmangin an khung a, minute hnih hnuah Morocco tan Achraf Dari chuan a sut thung - chawlhlawk hmain Mislav Orsic hmangin Croatia lamin an khung belh.

Croatia hian kum 1998 khan a vawi khat nan World Cup an khel ve chauh, inelna hnuhnung zawkah khan final lutin nomawi inchuhna inkhelah an chak lo, pahnihna niin tunah pathumna dinhmun an luah.

World Cup vawi ruk khel tawhin ṭum thum chu medal an dawng tihna a ni.Chak lo Morocco tan pawh lawmna tur a awm ve tho, an thlen chin hi an ramin World Cup-a a thlen chin a ni zel a, an ram mai bakah Africa khawmualpui aiawhtu an nih avangin an tan chuan hlawhtlinna sang tak a ni tho.

Goal mawi a lut
Inrinni zan inkhelah Luka Modric chuan Croatia tan a match 162-na a khel a, kum 37 mi a nih tawh avangin a tana World Cup match hnuhnung ber a ni nghal, freekick pet tur ang taka a lan hnuah a pet lo a, goal an khung theih chhan pakhat a ni.

Goal sir lama awm Ivan Perisic tan ball an vawrh daih a, Tottenham Hotspur forward hian goal lama tauh loin Gvardiol tan a tauh thla. RB Leipzig defender hian hnai zetah chiang takin a tauh lut nghal - an lawm chhung erawh a rei bik lo thung.

Croatia lamin goal hmasa ber an khung aṭanga minute hnih hnuah Morocco lam an che fuh ve thung. Freekick-ah Croatia an che sual, ngaihtuah vak loa an lama an ball tauh per luah chu Dari-a'n keeper Dominik Livakovic dan hman hmain a pet lut.

Morocco tan kum 18 mi Bilal El Khannouss-a'n ram tana a match hmasa ber a khel a, a khel chhe lo. Mahse, vawi khat lek ball hlohin nghawng a neih natzia a hre chiang ang, a ball hloh vangin Croatia lamin Orsic hmangin an goal hnihna leh chakna goal an khung.

Sevilla striker Youssef En-Nesyri chu Morocco tana hun ṭha nei leh a ni, mahse World Cup khel ṭha tak keeper Dominik Livakovic a paltlang zo lo a, hun tawp dawnah hnai angreng tak aṭangin goal bar hrulah a tauh chhuak bawk.

An lawm
Croatia coach Zlatko Dalic chuan, "Pathumna kan ni a ni mai thei, mahse a hlutna erawh champion ang tho a ni.  eihtawp chhuahin tournament kan khel a, pathumna inchuhah chak lo ni ila a hrehawm ang, ka nauten inelna an hmachhawn chhan an tihlawhtling," a ti.

Dalic hian Euro 2024 thleng a hnathawh chhunzawm a tum, a senior player ṭhenkhat chelh theih a duh hle. Dalic chuan, "Ka player ṭhenkhat kum zat ngaihtuah chuan tun hi an World Cup hnuhnung ber a ni tawh ngei ang.

"Mahse, lungngaih tur a ni lo. Player naupang leh theihna sang tak tak kan nei a, hengte avang hian Croatia tan hlauh tur a awm lo. Tuna kan team tan hun a tawp tihna erawh a la ni lo, Nations League bakah Euro 2024 khelh tur kan nei," tiin a sawi.

Modric bakah kum 33 mi Perisic te tan World Cup hnuhnung a ni tawh ang, mahse coach Dalic-a'n a beisei anga thil a thleng a nih erawh chuan an captain leh winger ṭha hian Nations League leh Euro 2024 an la khel mai thei bawk.

Mumang a tawp
Morocco hi African ram zinga World Cup semifi nal thleng thei hmasa ber an ni, an thlen chin apiang hi an ram mai ni loin an khawmualpui tan mellung pawimawh bik a ni - coach Walid Regragui leh a naute hnathawh hi hriatreng a ni tawh ang.

Walid Regragui-a naute hian France an hmachhawn dawn khan hliam vangin harsatna an tawk, an tlarhnung phui ṭha tak chu a phui tawk loh phah. Croatia lakah pawh khel ṭha pangngai viau mah se thawh chhuah an harsat.

Morocco coach Regragui chuan, "World Cup kan khelh hma khan match khat lek pawh kan chak ring an awm lo mai thei, mahse tunah chuan kan ti ve thei a nih tih a takin kan lantir chiang viauah ka ngai.

"Kan rama naupang bakah khawvel hmun hrang hranga naupangte chuan World Cup champion nih hi an duhthusam a ni ṭhin, a bik takin kan ram naupang ten beiseina an neih thar phah tih ka hria, kha thil khan min tilawm," tiin a sawi.