Aizawl FC-in Kenkre an ngam

Inrinni khan I League match inkhel pawimawhah Aizawl FC an chak a, RG Stadium, Mualpuiah an mikhual Mumbai Kenkre FC chu 4-0 ngawtin an sawp.

Mizo club tan Lalchhanhima Sailo chuan goal hnih khungin, David Lalhlansanga leh Jeremy Laldinpuia ten goal khat ve ve an khung bawk a, Kenkre lamin a chhanletna tur an nei lo.

Aizawl FC-in hnehna an chan avangin table-ah parukna an ni a, match riat khelh tawhah hmahruaitu Real Kashmir chu point li chiahin an phak lo - champion sawi ri ngam tur an ni. AFC hian December 20 zanah Rajasthan FC an lenchilh leh ang a, kuminah match an nei tawh lo ang.

Beiseina
Mizo club-in Kenkre an mikhual hmain Aizawl FC coach thar Caetano Pinho chuan, "Hnehna kan chang ang a, fan-te chu khelmualah an rawn kal ve leh mai ang," tiin a sawi a, result ṭha hmanga fans koh khawm a tum thu a sawi.

Pinho hian a match hmasa berah Sreenidi Deccan hmachhawnin, 3-3 in an inhnehtawkpui a, RG Stadium-ah goal khung chhunzawmin, tlarhnung an him tel ta bawk a, a rahchhuah chu point thum a ni.

AFC hian inkhel ṭantir aṭangin Mumbai Kenkre hi an nawr nghal a, Lalchhanhima Sailo chuan post tih per nghalin, R. Lalthanmawia chuan uiawm takin a chance neih a chhawr lo bawk.

A hming Chhantea
A tirah Aizawl FC vanduai nghal mah se, an goal hmasa ber hmu turin an nghah rei a ngai lo - minute 14-na lekah Chhantea chuan goal hmahruai a khung a, minute 25-naah an goal hnihna a khung zui bawk.

Goal dang lut loin chawlhlawk hman a ni a, Mizo club-in tlawmngaih chhuah a, mikhual chunga ṭhat chhuah an tum chuang lo. Second half ṭan aṭanga minute thumna lekah bench aṭanga luhtir David Lalhlansanga chuan an goal thumna a khung. 

Kenkre an insiamrem hman lo - minute 68-naah Jeremy Laldinpuia chuan an goal lina a khung ve leh a, captain Lalchhawnkima ball tauh Kenkre keeper Tenzin Samdup-a'n ṭha zeta a dan chu uiawm tak a ni. Hun tawp thlengin goal dang a lut lo a, Mizo club-in an phu ang ngeiin hnehna an chang.