Club World Cup-ah team 32

Football khawvela thuneitu sang ber FIFA president Gianni Infantino chuan Club World Cup-ah team tam zawk an inel tawh tur thu a sawi a, June 2025 aṭang chuan club 32 an inel tawh dawn niin a sawi.

FIFA chuan hmeichhe tana Club World Cup ruahman an tum thu an sawi bawk a, ruahman anga engkim a kaltluang thei a nih chuan Club World Cup hi kumtina khel tawh loin, kum li dan zelah khelh tur a ni bawk ang.

Zirtawpni khan FIFA hruaitute chu Qatar-ah an inhmukhawm a, February 2023-a Club World Cup khelh tur chu Morocco-in a thleng dawn bawk a ni.

Morocco hian 2013 leh 2014-ah he inelna hi an lo thleng tawh bawk a, a hnuah Japan, United Arab Emirates leh Qatar-in an thleng ve leh bawk - nakkum erawh Morocco chan bawk a ni leh ta.

Kum 2018 khan FIFA chuan Club World Cup hi team 24 inelna turin ruahmanna a lo siam tawh a, June thlaa khelh tura tih niin, kum 2021 aṭanga hman ṭan turin an ruahman. 

Mahse, Covid-19 in nasa taka khawvel a run avangin football khawvel pawh a duh angin a kal thei bik lo a, ruahmanna hmasa hi ṭhulh a nih hnuah ruahmanna thar a awm leh ta a ni.

FIFA chuan Club World Cup hi tun hmaa an khelh ṭhin, World Cup hma kuma neih ṭhin FIFA Confederations Cup hmun ruakah neih a nih tur thu an sawi a, hetihlai hian football khawvela player intelkhawm pawl FIFPRO erawh FIFA thutharah hian an lawm lo hle.

FIFPRO chuan, "Player-te rem tihna chu sawi loh, inrawnna pawh awm miah loin he thutlukna hi siam a ni," tiin FIFA Council meeting thuchhuak chu an dem a, CWC chuan playerteah nghawng ṭha lo tak a neih theih thu an sawi.

Khawvela football league hrang hrang intelkhawm pawl, World Leagues Forum (WLF) pawhin FIFA ruahmanna chu na takin an sawisel a, FIFA chu player-te dinhmun ngaihtuah tawk loah an puh.

WLF chuan, "Tualchhung football club inelna leh international fixture ṭhang zel vangin calendar hi siksawi rual lohin a khat hneh em em a, hetiang kara FIFA thutlukna hian fixture buai, player inhliam leh hleih bik nei loa inelna thlengin a nghawng buai thei dawn a ni," a ti.

FIFA Club World Cup hnuhnung ber chu February khan khelh a ni a, Chelsea chuan Palmeiras hnehin an champion. Tuna CWC khelh mek danah chuan khawmual tina club champion leh inelna thlengtu ram champion ten inelna an hmachhawn ṭhin a ni.